ఒకే టైమ్‌లో ఇంగ్లండ్‌లో నాలుగు టీమ్‌ ఇండియాలు... విచిత్రమే!

లీడ్స్‌లో ఒక టీమ్‌ ఇండియా..లార్డ్‌‍్సలో మరో టీమ్‌ ఇండియా...నార్తాంప్టన్‌లో ఒక టీమ్‌ ఇండియా.. బ్రిస్టల్‌లో మరో టీమ్‌ ఇండియా...! ఇదేంటి.. ఒకటే జట్టు వేర్వేరు వేదికల్లో ఎలా ఉంది..? అదికూడా విదేశంలో అనుకుంటున్నారా..? మీరు చదివింది నిజమే.. ఆ మైదానాలు ఇంగ్లండ్‌లోవి..అక్కడ ఆడుతున్న జట్లు ఇండియావి. ఇంగ్లండ్‌లో సీనియర్‌ పురుషుల జట్టు ప్రస్తుతం ఐదు టెస్టుల సిరీస్‌లో తలపడుతోంది. ఇటీవల జరిగిన తొలి టెస్టులో చివరి నిమిషంలో ఓటమి పాలైంది. బుధవారం నుంచి రెండో టెస్టు మ్యాచ్‌ జరగనుంది. ఈ సిరీస్‌తోనే టీమ్‌ ఇండియా ప్రపంచ టెస్టు చాంపియన్‌షిప్‌ (డబ్ల్యూటీసీ) సైకిల్‌ను ప్రారంభించింది. పైగా సీనియర్లు, స్టార్‌ క్రికెటర్లు అయిన రోహిత్‌ శర్మ, విరాట్‌ కోహ్లి, రవిచంద్రన్‌ అశ్విన్‌ ముగ్గురూ లేకుండా 15 ఏళ్లలో తొలిసారి ఓ టెస్టు సిరీస్‌లో పాల్గొంటోంది. దీనికి 25 ఏళ్ల యువ బ్యాట్స్‌మన్‌ శుబ్‌మన్‌ గిల్‌ సారథ్యం వహిస్తున్నాడు.

-ఇంగ్లండ్‌ పురుషుల క్రికెట్‌లోనే కాదు.. మహిళల క్రికెట్‌లోనూ బలమైన జట్టు. మంచి టెక్నిక్‌తో ఆడతారు ఆ జట్టు మహిళలు. దూకుడు సరేసరి. అలాంటి ఇంగ్లండ్‌ మహిళలతో భారత మహిళల క్రికెట్‌ జట్టు 5 టి20లు, మూడు వన్డేల సిరీస్‌లో పాల్గొంటోంది. తొలి టి20లో తెలుగమ్మాయి శ్రీచరణి (4/12) ధాటికి ఇంగ్లండ్‌ కుప్పకూలింది. మంగళవారం ఈ రెండు జట్ల మధ్య రెండో టీ20 జరగనుంది.

-అండర్‌ 19 భారత జట్టు కూడా ప్రస్తుతం ఇంగ్లండ్‌లోనే ఉంది. 5 యూత్‌ వన్డేలు, 2 యూత్‌ టెస్టుల సిరీస్‌ ఆడుతోంది. తొలి యూత్‌ వన్డేను నెగ్గి.. సోమవారం రెండో మ్యాచ్‌లో త్రుటిలో ఓడింది. ఈ జట్టుకు కెప్టెన్‌ ఎవరో కాదు.. ఈ ఏడాది ఇండియన్‌ ప్రీమియర్‌ లీగ్‌ (ఐపీఎల్‌)లో ఆకట్టుకున్న 17 ఏళ్ల ముంబై కుర్రాడు ఆయుష్‌ మాత్రె. అంతేకాదు.. ఈ జట్టుకు ఓపెనర్‌ మరో యువ సంచలనం వైభవ్‌ సూర్యవంశీ. 14 ఏళ్ల వైభవ్‌.. ఐపీఎల్‌లో సెంచరీ కొట్టిన అత్యంత చిన్న వయస్కుడిగా రికార్డులకు ఎక్కిన సంగతి తెలిసిందే.

-ఇక నాలుగో జట్టు ఇండియా-ఎ. అయితే, ఈ జట్టు టూర్‌ ఇప్పటికే ముగిసింది. రెండు అనధికార టెస్టుల్లో ఇంగ్లండ్‌ లయన్స్‌ (ఇంగ్లండ్‌-ఎ)తో ఇండియా-ఎ తలపడింది. సీనియర్‌ జట్టులోని ఆటగాళ్లను ఇండియా-ఎ తరఫున ఇంగ్లండ్‌ పంపించారు. ఈ సిరీస్‌ జూన్‌ 10తో ముగిసింది. ఆ వెంటనే జట్టులోని ఆటగాళ్లు సీనియర్స్‌తో కలిశారు.

-అండర్‌-19 జట్టు జూలై 23, మహిళల జట్టు జూలై 22 వరకు మ్యాచ్‌లు ఆడనున్నాయి. పురుషుల సీనియర్‌ జట్టు టూర్‌ ఆగస్టు 4తో ముగుస్తుంది. ఏది ఏమైనా భవిష్యత్‌ భారత క్రికెట్‌ ఒకే సమయంలో ఇంగ్లండ్‌లో ఉండడం విశేషమే కదా..?