యాదాద్రిలో సారూ.. కారు బొమ్మ వ్యవహారం రచ్చ రచ్చ

ప్రముఖ పుణ్యక్షేత్రం యాదాద్రి ఆలయంలో నిర్మిస్తున్న ఆలయ శిలల మీద తెలంగాణ రాష్ట్ర ముఖ్యమంత్రి కేసీఆర్.. టీఆర్ఎస్ పార్టీ ఎన్నికల గుర్తు కారు.. టీఆర్ఎస్ పథకాల బొమ్మలు చెక్కించిన వైనం బయటకు రావటం.. అదో సంచలనంగా మారటం తెలిసిందే. ఈ అంశంపై వేస్తున్న ప్రశ్నలకు ఎవరూ సమాధానం చెప్పలేకపోతున్నారు.

గుట్టుగా బొమ్మలు చెక్కిన అంశం.. ప్రముఖ మీడియా అచ్చేసిన ప్రత్యేక కథనంతో బయటకు రావటంతో ఈ వ్యవహారం ఇప్పుడు హాట్ హాట్ గా మారింది. గుడిలో ఏర్పాటుచేసిన శిలలపై ముఖ్యమంత్రి బొమ్మ.. పార్టీ గుర్తులను ఎలా చెక్కిస్తారంటూ వేస్తున్న ప్రశ్నలతో గులాబీ పరివారం ఉక్కిరిబిక్కిరి అవుతోంది.

ఈ అంశంపై యాదాద్రి టెంపుల్ డెవలప్ మెంట్ అథారిటీ వైస్ ఛైర్మన్ కిషన్ రావు రియాక్ట్ అవుతూ.. ఈ బొమ్మల విషయం తమకు తెలీదని.. స్తపతితో మాట్లాడి వివరణ తీసుకుంటానని చెప్పారు. ఆలయంలో ఇలాంటి బొమ్మలు ఎలా చెక్కిస్తారన్న ప్రశ్నకు.. ఆ విషయం తనకు జరిగిందన్నది తెలీదని.. పత్రికల్లో వచ్చిన విషయాల్ని ఒకసారి చెక్ చేసుకోవాలంటూ కవర్ చేసే ప్రయత్నం చేశారు. ఇదిలా ఉంటే.. ఈ అంశంపై విపక్షాలు విరుచుకుపడుతున్నాయి. తీవ్రంగా తప్పు పడుతున్నాయి. కేసీఆర్ అహంకారానికి ప్రతీకగా పలువురు నేతలు అభివర్ణిస్తున్నారు. మొత్తంగా చూస్తే.. గుడిలో సారు..కారు.. సర్కారు పథకాల బొమ్మలు కొత్త రచ్చకు కారణమయ్యాయని చెప్పక తప్పదు.