సీక్రెట్ యాప్ తో భార్య ఫోన్ ట్యాపింగ్.. ఏం జరిగిందంటే?

సీక్రెట్ యాప్ ను రహస్యంగా భార్య ఫోన్ లో ఇన్ స్టాల్ చేశాడు భర్త. అనంతరం ఆమెను నీడలా వెంటాడాడు. ఏం చేస్తుందో ఎప్పటికప్పుడు తెలుసుకున్నాడు. ఈ క్రమంలోనే గుర్తించిన భార్య తనను ఇబ్బందులకు గురిచేస్తున్నాడని పోలీసు గడప తొక్కింది. తనను అనుమానంతో వేధిస్తున్నాడని ఆమె వాపోయింది.

కరీంనగర్ జిల్లా కోరుట్ల పట్టణంలో ఈ దారుణం జరిగింది. కోరుట్లకు చెందిన టి. నర్సింహాచలం (48) తన భార్య అనిత ఫోన్ లో ఓ సీక్రెట్ యాప్ ను ఇన్ స్టాల్ చేశాడు. ఆ యాప్ తో ఆమె ఫోన్ ను ట్రేస్ చేయడం మొదలుపెట్టాడు. దీంతోపాటు ఆమె ఫోన్ ను కూడా భర్తే ఆపరేట్ చేస్తున్నాడు. వీటితోపాటు ఆమె వాట్సాప్ చాటింగ్ చూడడం.. ఆడియో రికార్డింగ్ వినడం వంటివి చేస్తున్నాడు.

ఇక ఆమెకు తెలియకుండా ఆమె ఫోన్ ను అతడు అనుసంధానం చేసుకొని వాటితో వీడియో షూటింగ్ కూడా చేసే వాడు. ఈ విషయం భార్య ఆలస్యంగా గుర్తించి బుధవారం పోలీసులను ఆశ్రయించింది.

కేసు నమోదు చేసుకొని విచారణ చేపట్టగా భర్త నర్సింహాచలం భార్య ఫోన్ లో చేసిన నిర్వాకాన్ని అంగీకరించాడు. కొన్నేళ్ల కింద ఇంట్లోనుంచి పోయిన బంగారం విషయంలో ఆరాతీయడానికి ఈ సీక్రెట్ యాప్ ఇన్ స్టాల్ చేసినట్టు నిందితుడు తెలిపాడు. ఇదే రీతిలో మరో ఇద్దరు బంధువుల ఫోన్లలోనూ సీక్రెట్ యాప్ వారికి తెలియకుండా ఇన్ స్టాల్ చేసినట్టు విచారణలో తేలింది.

బంధువుల ఫోన్లలో ఎందుకు యాప్ ఇన్ స్టాల్ చేశాడన్న దానిపై పోలీసులు విచారిస్తున్నారు. బాధితురాలి ఫిర్యాదు మేరకు పోలీసులు భర్తపై కేసు నమోదు చేసి విచారణ జరుపుతున్నారు