యూరోపియన్లు, ఇండియన్లను వేరువేరుగా చూస్తున్న వాట్సాప్​..!

వాట్సాప్​ తీసుకొచ్చిన ప్రైవసీ పాలసీపై ఇటీవల తీవ్ర విమర్శలు వస్తున్న విషయం తెలిసిందే. ప్రైవసీ పాలసీపై యూజర్లు తీవ్ర ఆగ్రహం వ్యక్తం చేస్తున్నారు. మరోవైపు వాట్సాప్​ వినియోగదారులు సిగ్నల్​, టెలిగ్రామ్​ వంటి మెసెంజర్​ యాప్​లకు మారిపోతున్నారు. ఈ నేపథ్యంలో ఓ వ్యక్తి ఢిల్లీ హైకోర్టులో పిటిషన్ దాఖలు చేశారు. ఈ సందర్భంగా కేంద్ర ప్రభుత్వం ఢిల్లీ హైకోర్టుకు పలు కీలక విషయాలను నివేదించింది. వాట్సాప్​ ద్వంద్వ విధానాలను అవలంభిస్తున్నదని కేంద్రం హైకోర్టుకు తెలిపింది. యూరోపియన్​ యూజర్లు, ఇండియన్ యూజర్లను వేరువేరుగా చూస్తున్నదని పేర్కొన్నది.
అయితే కొత్త పాలసీపై ఇప్పటికే వాట్సాప్​కు లేఖ పంపినట్టు కేంద్రం పేర్కొన్నది.

భారతీయుల వ్యక్తిగత భద్రత విషయంలో రాజీ పడబోమని తెలిపింది. ఈ మేరకు అడిషినల్​ జనరల్​ చేతన్​ శర్మ కోర్టుకు నివేదించారు. వాట్సాప్​ గోప్యత విషయంలో ఏకపక్షంగా వ్యవహరిస్తున్నదని కేంద్రం ఆరోపిస్తున్నది. అయితే యూరోపియన్​లో వ్యక్తిగత సమాచారం షేర్​ చేసుకోవడం నేరం. అందుకే అక్కడ వాట్సాప్​ నిబంధనలు కచ్చితంగా అంగీకరించాలన్న నిబంధన లేదు. కానీ భారత్​లో మాత్రం ఈ నిబంధన లేకపోవడంతో వాట్సాప్​ ఇష్టారాజ్యంగా వ్యవహరిస్తున్నది.

అయితే ఈ విషయంపై ప్రభుత్వం కోరిన వివరాలపై త్వరలోనే స్పందిస్తామని వాట్సాప్​ తరఫున హాజరైతన కపిల్​ సిబల్​ కోర్టుకు తేలిపారు. దీంతో ఈ కేసుపై విచారణను ఢిల్లీ హై కోర్టు మార్చి 15కు వాయిదా వేసింది. మరోవైపు వాట్సాప్​పై విమర్శలు వెల్లువెత్తున్నాయి. ఇప్పటికే సోషల్​మీడియాలో పలువురు వాట్సాప్​ ప్రైవసీ విధానాలను తప్పుపడుతున్నారు.