రోహిత్​ ఏంటిది? నువ్వేనా ఆ షాట్​ ఆడింది..! హిట్​మ్యాన్​ ఆటపై తీవ్ర విమర్శలు

ఆస్ట్రేలియా టూర్​లో టెస్ట్​క్రికెట్​ ఆడుతున్న రోహిత్​శర్మపై తీవ్రస్థాయిలో విమర్శలు వస్తున్నాయి. చివరి టెస్ట్​లో రోహిత్​ అనవసర షాట్​ ఆడాడంటూ అతడిపై విమర్శలు వస్తున్నాయి. ఇప్పటికే సోషల్​మీడియాలో ట్రోలింగ్​ మొదలైంది. మరోవైపు సీనియర్​ క్రికెటర్​ సునీల్​ గవాస్కర్​ కూడా రోహిత్​ ఆటతీరుపై విమర్శలు గుప్పించారు. ఆస్ట్రేలియాలో బ్రిస్బేన్ వేదికగా జరుగుతున్న చివరి టెస్టు మ్యాచ్‌లో రోహిత్​ ఓ నిర్లక్ష్యపు షాట్​ ఆడి వికెట్​ కోల్పోయాడు.


ఆటలో రెండో రోజైన శనివారం స్పిన్నర్ నాథన్ లయన్ బౌలింగ్​లో హిట్​మాన్​ క్రీజ్​లో ఉన్నాడు. అప్పటికే 74 బంతుల్లో 44 పరుగులు చేశారు. నాలుగు ఫోర్లు కొట్టాడు. అయితే లయన్​ వేసిన ఓ బంతిని భారీ షాట్​ ఆడబోయి క్యాచ్​ అవుట్​ అయ్యాడు. రోహిత్​ కొట్టిన బంతి లాంగాన్‌లో ఫీల్డర్ మిచెల్ స్టార్క్ చేతికి చిక్కింది.


రోహిత్ శర్మ షాట్ పై సునీల్ గవాస్కర్ మండిపడ్డాడు. 'రోహిత్​ ఎందుకలా ఆడాడో నేను ఊహించలేకపోయా. అది బాధ్యతారాహిత్యమైన షాట్​. రోహిత్​ క్రీజ్​లో ఉన్నప్పుడు లాంగాన్​లో ఫీల్డర్​ ఉన్నాడు. డీప్​ స్క్వయర్​ లెగ్​లోనూ ఓ ఫీల్డర్​ ఉన్నాడు. అటువంటప్పుడు రోహిత్​ ఆ షాట్​ ఆడి ఉండాల్సింది కాదు. పరుగుల కోసమా.. ఆ షాట్‌కి రెండు బంతుల ముందు ఒక బౌండరీని రోహిత్ శర్మ సాధించాడు. ఆ తర్వాత కూడా అతడు ఎందుకంత తాపత్రయపడ్డాడో. రోహిత్​ నుంచి ఆ షాట్​ నేను ఊహించలేదు. అతడో సీనియర్​ క్రికెటర్​. ఎన్నో మెరుగైన ఇన్సింగ్స్​ ఆడాడు’ అంటూ గవాస్కర్​ వ్యాఖ్యానించాడు.