హైదరాబాద్ కు ఏమైంది? బ్యాడ్ సండే.. రెండు ఘోర రోడ్డు ప్రమాదాలు

హైదరాబాద్ మహా నగరానికి ఏమైంది? ఇటీవల కాలంలో రోడ్డు ప్రమాదాలు అంతకంతకూ పెరిగిపోతున్నాయి. మితిమీరిన వేగంతో పాటు..అప్రమత్తతతో డ్రైవింగ్ చేయాల్సిన విషయంలో జరుగుతున్న తప్పులు.. ఘోర రోడ్డు ప్రమాదాలకు కారణమవుతున్నాయి. మిగిలిన ఆదివారాలకు భిన్నంగా.. ఈ సండే హైదరాబాదీలకు ఏ మాత్రం బాగోలేదని చెప్పాలి. ఈ రోజు తెల్లవారుజామున రెండు రోడ్డు ప్రమాదాలు చోటు చేసుకున్నాయి.

ఈ రెండు ప్రమాదాల్లో పలువురు మరణించటం గమనార్హం. గచ్చిబౌలిలోని విప్రో సర్కిల్ వద్ద టిప్పర్ లారీ.. కారు ఢీ కొన్నాయి. ఈ ఘటనలో కారులో ప్రయాణిస్తున్న నలుగురు యువకులు అక్కడికక్కడే మరణిస్తే.. మరో యువకుడికి తీవ్ర గాయాలయ్యాయి. ఆసుపత్రిలో వైద్యం చేస్తుండగా మరణించినట్లుగా తెలుస్తోంది. ఆదివారం తెల్లవారుజామున మూడు గంటల సమయంలో ఈ ఘోర ప్రమాదం చోటు చేసుకుంది. అతి వేగమే ఈ ప్రమాదానికి కారణంగా చెబుతున్నారు. ప్రమాదంలో మరణించిన నలుగురు యువకులు పాతికేళ్ల లోపు వారే కావటం గమనార్హం.

ఈ ప్రమాదం షాక్ నుంచి తేరుకోక ముందే.. ఈ ఉదయం మరో ప్రమాదం కుకట్ పల్లిలో చోటుచేసుకుంది. ఈ ఉదయం పిల్లర్ నెంబరు ఎ-836 వద్ద టూవీలర్ ను లారీ ఢీ కొట్టింది. ఈ ఘటనలో ప్రకాశ్ అనే యువకుడు అక్కడికక్కడే మరణించారు. వేగమే ఈ ప్రమాదానికికూడా కారణమని చెబుతున్నారు. రెండు ప్రమాదాలు ఆదివారం ఉదయం వేళలోనే చోటు చేసుకోవటం చూస్తే.. ఇది కచ్ఛితంగా బ్యాడ్ సండేగా చెప్పక తప్పదు.