వాజ్‌ పేయిపై అద్వానీ కుట్ర చేశార‌ట‌

కొన్ని వియాలు అస‌లు న‌మ్మ‌లేకుండా ఉంటాయి. కానీ వాటిని ప్ర‌త్య‌క్షంగా చూసిన‌వారు తెలియ‌జేస్తే...నిజ‌మే క‌దా అనిపిస్తుంది. న‌రేంద్ర‌మోడీ ప్ర‌ధాన‌మంత్రి పీఠం ఎక్కే వ‌ర‌కు బీజేపీ అగ్ర‌నేత‌లుగా చెలామ‌ణిలో ఉన్న మాజీ ప్ర‌ధాన‌మంత్రి అట‌ల్ బిహారీ వాజ్ పేయి - ఉప ప్ర‌ధాన‌మంత్రి ఎల్కే అద్వానీల మ‌ధ్య కుట్ర‌ల రాజ‌కీయ జ‌రిగిందంటే న‌మ్ముతారా? ఆశ్చ‌ర్యంగా ఉన్న‌ప్ప‌టికీ ఇది నిజం. వాజ్ పేయిని గ‌ద్దె దించేందుకు అద్వానీ కుట్ర చేశార‌ని సీనియ‌ర్ జర్నలిస్ట్ ఎన్ పీ ఉల్లేఖ్ రాసిన "ది అన్ టోల్డ్ వాజ్‌ పేయి; పొలిటియన్ అండ్ పారడాక్స్" పుస్తకంలో వెల్లడించారు.

ఉల్లేఖ్ రాసిన పుస్త‌కం ప్ర‌కారం ఎన్డీఏ నాయ‌కుడిగా వాజ్ పేయి ప్ర‌ధాన‌మంత్రి బాధ్య‌త‌లు స్వీక‌రించిన కొద్దిరోజుల‌కే ఆయ‌న్ను గ‌ద్దె దింపి అద్వానీని ప్ర‌ధానిగా చేయాల‌ని కుట్ర జ‌రిగింద‌ట‌. ఈ విష‌యం విశ్వ‌స‌నీయ వ‌ర్గాల ద్వారా తెలుసుకున్న ప్ర‌ధాన‌మంత్రి వాజ్ పేయి ఆ స‌మ‌యంలో త‌న ద‌గ్గ‌ర‌కు వ‌చ్చిన ఓ మంత్రితో ఈ కుట్ర‌ను పంచుకున్నార‌ట‌. అయితే స‌ద‌రు మంత్రి ఎల్ కే అద్వానీ కేంద్రంగా ఇలాంటి కుట్ర జ‌రుగుతుంద‌ని త‌మ‌కు సైతం అవ‌గాహ‌న ఉంద‌ని చెప్ప‌డంతో వాజ్‌పేయి ఒకింత షాక్‌కు గుర‌య్యార‌ట‌. అయితే ఈ కుట్ర తాలుకూ త‌ద‌నంతర ప‌రిణామాలు తెలుసుకునేందుకు వాజ్ పేయి ప్ర‌యత్నించార‌ట‌.

ఈ విషయాల‌కు మ‌ద్దతుగా ఉన్న ప‌లు అంశాల‌ను కూడా ఈ పుస్త‌కంలో ఉల్లేఖ్ రాసుకొచ్చారు. బీజేపీకి మార్గ‌ద‌ర్శ‌క‌త్వం వ‌హించే రాష్ట్రీయ స్వ‌యం సేవ‌క్ సంఘ్ ఆధ్వ‌ర్యంలో వాజ్ పేయిని రాష్ట్రప‌తిని చేసి అద్వానీని ప్ర‌ధాని పీఠంపై కూర్చోబెట్టాల‌నే ప్ర‌య‌త్నం జ‌రగ‌టాన్ని ప్ర‌స్తావించారు. ఈ క్ర‌మంలో అద్వానీ కేంద్రంగా వాజ్‌పేయిని దింపే కుట్ర జ‌రిగి ఉంటుంద‌ని విశ్లేషించారు.

Like Us on Facebook : https://www.facebook.com/Tupakidotcom/