ఉబర్ హెలికాఫ్టర్ సర్వీసులు..?

ఉబర్ పేరు విన్న వెంటనే ఓ మోస్తరు కారు మొదలు.. అత్యంత విలాసవంతమైన క్యాబ్ సేవలు అందించటం గుర్తుకు వస్తుంది. క్యాబ్ ప్రయాణ రూపురేఖల్ని పూర్తిగా మార్చేసిన ఈ అమెరికన్ కంపెనీ త్వరలో సరికొత్త సేవల్ని అందించేందుకు సిద్ధమవుతోంది.

కొన్ని ప్రత్యేక సందర్భాల్లో హెలికాఫ్టర్ సేవల్ని అందించిన ఉబర్.. ఇకపై ఆ సేవల్ని రెగ్యులర్ గా అందించే ఆలోచనలో ఉన్నట్లు తెలుస్తోంది. అయితే.. ఈ సేవలు తొలుత అమెరికాలో అందిస్తారని.. అక్కడ వచ్చిన స్పందనకు అనుగుణంగా మిగిలిన దేశాలకు విస్తరించనున్నట్లుగా చెబుతున్నారు. కొన్ని ఫిలిం ఫెస్టెవల్స్ సందర్భంగా గతంలో హెలికాఫ్టర్ సేవల్ని అందించిన ట్రాక్ రికార్డు ఉబర్ సొంతం.

తాజాగా అమెరికాలోని ఉటా పార్క్ సిటీలో జనవరి 21 నుంచి జరిగే సన్ డ్యాన్స్ ఫిలిం ఫెస్టివల్ లో మరోసారి హెలికాఫ్టర్ సర్వీసుల్ని ప్రయోగాత్మకంగా అందించేందుకు సిద్ధమవుతోంది. తన తాజా హెలికాఫ్టర్ సేవల కోసం ఉబర్.. ప్రఖ్యాత ఏరోస్సేస్ కంపెనీ అయిన ఎయిర్ బస్ తో జత కట్టనుంది. క్యాబ్ సర్వీసుల మాదిరే హెలికాఫ్టర్ సర్వీసుల విషయంలోనూ ఉబర్ అదరగొడుతుందో లేదో చూడాలి.​