ఏపీ రాజకీయాల్లో కేసీఆర్ కీలకపాత్ర

ఏపీ రాజకీయాల్లో కూడా కేసీఆర్ కీలక పాత్రపోషిస్తారని మాజీ మంత్రి, టీఆర్ఎస్ ఎమ్మెల్యే తలసాని శ్రీనివాస్ యాదవ్ కీలక వ్యాఖ్యలు చేశారు. సోమవారం ఉదయం తిరుమల వేంకటేశ్వరుడిని దర్శించుకున్న తలసాని శ్రీనివాస్ యాదవ్ ఈ సందర్భంగా మీడియాతో మాట్లాడారు. నాలుగు నెలల్లోనే దేశ రాజకీయ ముఖచిత్రం మారబోతోందని జోస్యం చెప్పారు. కేసీఆర్ నేతృత్వంలో ఫెడరల్ ఫ్రంట్ జాతీయ రాజకీయాల్లో చక్రం తిప్పుతుందని చెప్పుకొచ్చారు.

ఇక ఏపీ రాజకీయాలపై కూడా తలసాని సంచలన వ్యాఖ్యలు చేశారు. టీడీపీ పరిపాలన చేయకుండా విపక్ష పార్టీల వలే దీక్షలు చేయడం ఏంటని ఎద్దేవా చేశారు. చంద్రబాబు పనులు చేయకుండానే ప్రచారంతోనే కాలం గడిపేస్తున్నారని విమర్శించారు.

ఎన్టీఆర్ సిద్ధాంతాలను తెలుగుదేశం పార్టీ పక్కనపెట్టి కాంగ్రెస్ వెంట పడుతోందని తలసాని ఆరోపించారు. కాంగ్రెస్ వెంట నడిస్తే తెలంగాణలో మునిగినట్టే ఏపీ - జాతీయ స్థాయిలో కూడా టీడీపీ అడ్రస్ గల్లంతు అవుతుందని స్పష్టం చేశారు. కేసీఆర్ తెలుగు ప్రజలందరూ సంతోషంగా ఉండాలని కోరుకుంటున్నారని.. ఏపీ ప్రజల తరుపున కూడా పోరాడుతారని.. వచ్చే ఎన్నికల్లో ఏపీ రాజకీయాల్లోకి వస్తారని తలసాని పేర్కొన్నారు.