చంద్ర‌బాబుతో సుభాష్ ఘ‌య్ భేటీ!

ఏపీ సీఎం చంద్రబాబునాయుడును ప్ర‌ముఖ‌ బాలీవుడ్ దర్శకుడు సుభాష్ ఘ‌య్ మంగళవారం మధ్యాహ్నం అమరావతిలో కలిశారు. ఆంధ్రప్రదేశ్ లో ఫిల్మ్ ఇన్‌ స్టిట్యూట్ ఏర్పాటు చేసేందుకుగాను ప్రభుత్వ పరంగా సహకారం అందించాలని చంద్రబాబును సుభాష్ ఘ‌య్ కోరినట్లు సమాచారం. ఈ ప్ర‌తిపాద‌న‌కు చంద్ర‌బాబు కూడా సానుకూలత వ్యక్తం చేశారని తెలుస్తోంది. విభ‌జ‌నానంత‌రం ఆంధ్ర ప్ర‌దేశ్ లో ఫిల్మ్ - టెలివిజ‌న్ ఇన్ స్టిట్యూట్ ల‌ను ఏర్పాటు చేయాల‌ని ప్ర‌భుత్వం భావించింది. అమ‌రావ‌తి - విశాఖ ప‌ట్నం ల‌లో వాటిని ఏర్పాటు చేసి ప్ర‌తిభావంతులైన యువ‌త‌కు న‌ట‌న‌లో శిక్ష‌ణ‌ను ఇప్పించాల‌నుకుంది. అమ‌రావ‌తిలో ఫిల్మ్ ఇన్ స్టిట్యూట్ ఏర్పాటు చేసేందుకు జులైలో 14 మంది స‌భ్యుల‌తో ఓ క‌మిటీని కూడా ప్ర‌భుత్వం నియ‌మించిన‌ట్లు తెలుస్తోంది. ఈ నేప‌థ్యంలో సుభాష్ ఘ‌య్ ప్ర‌తిపాద‌న‌కు సీఎం సానుకూలంగా స్పందించిన‌ట్లు తెలుస్తోంది.

గ‌తంలో కూడా సుభాష్ ఘ‌య్ హైద‌రాబాద్ లో ఫిల్మ్ ఇన్ స్టిట్యూట్ ను ఏర్పాటు చేసేందుకు స‌హ‌క‌రించాల‌ని ఐటీ మంత్రి కేటీఆర్ ను సంప్ర‌దించారు. దానికి సానుకూలంగా స్పందించిన కేటీఆర్‌...రాచ‌కొండ‌లో ఆ ఇన్ స్టిట్యూట్ ను ఏర్పాటు చేసుకోమ‌ని చెప్పిన‌ట్లు తెలుస్తోంది. స్థానిక యువ‌త‌కు న‌ట‌న‌లో శిక్ష‌ణ ఇప్పించాల‌నే ఉద్దేశంతో కేటీఆర్ ఈ ప్ర‌తిపాద‌న‌కు సుముఖ‌త వ్య‌క్తం చేసిన‌ట్లు స‌మాచారం. ముంబైలో సుభాష్ ఘ‌య్ విజ్ లింగ్ వుడ్స్ పేరుతో ఓ ఫిల్మ్ ఇన్ స్టిట్యూట్ ను ప‌దేళ్లుగా నిర్వహిస్తున్నారు. అదే త‌ర‌హాలో ప్ర‌పంచ స్థాయి ఇన్ స్టిట్యూట్ ను హైద‌రాబాద్ లో ఏర్పాటు చేసేందుకు కేటీఆర్ ను సుభాష్ ఘ‌య్ క‌లిశారు.