చైన్​ స్నాచింగ్​ చేస్తూ దొరికిపోయిన సాఫ్ట్​వేర్​ ఉద్యోగి..!

ఓ సాఫ్ట్​వేర్​ ఉద్యోగి తప్పుదారి పట్టాడు. బయటకు ప్రొఫెషనల్​గా కనిపించే ఈ ఉద్యోగి అప్పుడప్పుడు చైన్​ స్నాచింగ్​లకు పాల్పడుతుంటాడు. అయితే ఇతడు సాఫ్ట్​వేర్​ ఉద్యోగి కావడంతో ఎవరికీ ఏ అనుమానం రాలేదు. ఒకే కాలనీని టార్గెట్​ చేసి చైన్​స్నాచింగ్​లకు పాల్పడుతున్నాడు. చిక్కడపల్లికి చెందిన రామకృష్ణ (37) సాఫ్ట్​వేర్​ ఉద్యోగిగా పనిచేస్తున్నాడు. కానీ ఖాళీ సమయంలో చిక్కడపల్లి సమీపంలోని గల్లీల్లో ఒంటరిగా వెళ్లే మహిళలను, యువతులను టార్గెట్​ చేస్తూ చైన్​ స్నాచింగ్​కు పాల్పడుతున్నాడు.

అయితే గత జనవరి 7న ఓ మహిళ మెడలో నుంచి చైన్​ను కొట్టేశాడు. సీసీ కెమెరాల ఆధారంగా పోలీసులు విచారణ జరిపి నిందితుడిని అదుపులోకి తీసుకున్నారు. అతడి వద్ద నుంచి 30 గ్రాముల బంగారం, రెండు టూ వీలర్ బండ్లను, ఒక మొబైల్ ఫోన్‌ను స్వాధీనం చేసుకున్నారు. రామకృష్ణ చాలాకాలంగా స్థానికంగా ఉండటం.. సాఫ్ట్​వేర్​ ఉద్యోగి కావడంతో ఎవరికీ ఏ అనుమానం రాలేదు. అయితే వరసగా దొంగతనాలు జరుగుతుండటంతో స్థానికులు పోలీసులకు ఫిర్యాదు చేశారు.

దీంతో పోలీసులు సీసీ కెమెరాల ఆధారంగా విచారణ చేపట్టగా రామకృష్ణ పట్టుబడ్డాడు. అయితే ఇటీవల కాలంలో సాఫ్ట్​వేర్​ ఉద్యోగులు, ఇతర ఉన్నత ఉద్యోగాలు చేసే వాళ్లు, బీటెక్​ విద్యార్థులు చైన్​స్నాచింగ్​కు పాల్పడుతున్నారు.

కొంతకాలం క్రితం సాఫ్ట్​వేర్​ ఉద్యోగులు గంజాయి స్మగ్లింగ్​లోనూ పట్టుబడ్డారు. ప్రస్తుతం హైదరాబాద్​లో అడుగడుగునా సీసీ కెమెరాలు ఏర్పాటు చేశారు.