‘మాకు కరోనా టీకాలు వేయకండి’ రష్యన్లకు టీకా అంటేనే భయం పట్టుకుందా?

కరోనాకు టీకా ఎప్పడొస్తుందా అని యావత్​ ప్రపంచం ఎదురుచేస్తున్నది. ఇప్పటికే పలు కంపెనీలు టీకాలు తయారు చేసి క్లినికల్​ ట్రయల్స్​ను కొనసాగిస్తున్నాయి. రష్యా ప్రభుత్వం ఓ అడుగు మందుకేసి టీకా పంపిణీని కూడా మొదలు పెట్టింది. రష్యా టీకా సేఫ్​ కాదని.. క్లినికల్​ ట్రయల్స్​ పూర్తి కాలేదని పలు దేశాల శాస్త్రవేత్తలు మొత్తకుంటున్నా రష్యా ప్రభుత్వం మాత్రం వెనక్కి తగ్గడం లేదు. టీకా మూడో దశ ట్రయల్స్​ ఫెయిల్​ అయ్యాయని.. టీకా తీసుకున్న వాళ్లలో 17 శాతం మంది తీవ్ర అస్వస్థతకు గురయ్యారన్న వార్తలు వచ్చాయి. ఈ వార్తలను ఆ దేశ ప్రభుత్వం తోసిపుచ్చింది. అయితే టీకా పంపిణీలో రష్యా సర్కారుకు కొత్త చిక్కులు వచ్చాయట. ఆ దేశ ప్రజలెవరూ రష్యా తయారు చేసిన స్పుత్నిక్​​-వీ టీకాను తీసుకోవడం లేదని సమాచారం.

రష్యా ప్రజలెవరూ టీకాలు వేయించుకోవడానికి ఇష్టపడటం లేదని ఓ సర్వే తేల్చి చెప్పింది. పోల్స్టర్ లెవాడా సెంటర్ నిర్వహించిన పోల్ లో ఈ విషయం వెల్లడి అయింది. అక్టోబర్ 20 నాటికి 59% రష్యన్లు టీకాను తిరస్కరించారట. ప్రపంచంలోని మొట్టమొదటి కోవిడ్ -19 వ్యాక్సిన్‌ ను ఆ దేశం తయారు చేసింది. ఓ వైపు పూర్తిస్థాయిలో క్లినికల్​ ట్రయల్స్​ పూర్తికాకపోవడం.. మరోవైపు సైడ్​ ఎఫెక్ట్స్​ వస్తుండటంతో రష్యా వైద్యశాఖ తీవ్ర ఆందోళన చెందుతున్నది. ఈ నేపథ్యంలో టీకాలను తీసుకోవడానికి ప్రజలు నిరాకరిస్తుండటంతో మరిన్ని ఇబ్బందులు ఎదురవుతున్నాయి. టీకా తీసుకున్న వారు తీవ్ర అస్వస్థతకు గురవుతున్నారని సోషల్​మీడియాలో దుష్ప్రచారం చేయడమే ఇందుకు కారణమని ప్రభుత్వ వర్గాలు భావిస్తున్నాయట. ఈ సవాళ్లను ఎదుర్కొని రష్యా ప్రభుత్వం టీకా పంపిణీని ఎలా కొనసాగిస్తుందో వేచి చూడాలి.