ర‌ఫేల్ పై రాహుల్ పిక్చ‌ర్‌ పంచ్‌.. ‘దొంగ గ‌డ్డం’ అంటూ ఘాటు విమర్శ

రఫేల్ యుద్ధ విమానాల కొనుగోలులో అవినీతి జ‌రిగిందంటూ కాంగ్రెస్ జాతీయ నేత రాహుల్ గాంధీ మొద‌ట్నుంచీ యుద్ధం చేస్తూనే ఉన్న సంగ‌తి తెలిసిందే. యూపీఏ ప్ర‌భుత్వం చేసిన డీల్ ను ర‌ద్దు చేసి, ఆ త‌ర్వాత కొత్త‌గా ఒప్పందం చేసుకున్న న‌రేంద్ర‌మోడీ స‌ర్కారు.. అవ‌క‌త‌వ‌క‌ల‌కు పాల్ప‌డిందంటూ విమ‌ర్శ‌లు చేస్తూనే ఉన్నారు.

పార్ల‌మెంట్ సాక్షిగా కూడా బీజేపీ స‌ర్కారుపై విమ‌ర్శ‌ల బాంబులు వేశారు. జాతీయ స్థాయిలో ఈ వ్య‌వ‌హారం పెద్ద ఎత్తున చ‌ర్చ‌నీయాంశం అయ్యింది. అనిల్ అంబానీ కంపెనీకి ల‌బ్ధి చేకూర్చేందుకే ఈ రాఫెల్ డీల్ కుదుర్చుకున్నార‌ని రాహుల్ విమ‌ర్శించారు.

తాజాగా.. రాహుల్ సోష‌ల్ మీడియా వేదిక‌గా న‌రేంద్ర మోడీకి కౌంట‌ర్ వేశారు. ఇందులో భాగంగా ఓ ఫొటో షేర్ చేశారు. ఆ ఫొటోలో ర‌ఫేల్ విమానం పొగ వ‌దులుతూ వెళ్తోంది. అయితే.. వెన‌కాల మాత్రం ఆ పొగ‌తో తెల్ల‌టి గ‌డ్డంతో కూడిన మ‌నిషికి ఆకారం క‌నిపిస్తోంది. అది న‌రేంద్ర మోడీ పిక్చ‌ర్ అన్న విష‌యం చూడ‌గానే ఎవ‌రికైనా అర్థ‌మైపోతుంది.

ఆ పోస్టుకు ఓ క్యాప్ష‌న్ కూడా పెట్టారు రాహుల్‌. 'చోర్ కీ దాడీ' అని రాశారు. అంటే.. దొంగ గడ్డం అని అర్థం. ఈ పోస్టుతో.. ర‌ఫేల్ డీల్ వ్య‌వ‌హారం మ‌రోసారి తెర‌పైకి వ‌చ్చింది. ఈ వ్య‌వ‌హారంపై జేసీపీ (జాయింట్ పార్ల‌మెంట‌రీ క‌మిటీ)తో విచార‌ణ జ‌రిపించాల‌ని కాంగ్రెస్ డిమాండ్ చేస్తోంది. కాగా.. అటు ఫ్రాన్స్ లోనూ ఈ డీల్ పై న్యాయ విచార‌ణ సాగుతోంది.