మేళతాళాలతో ఊళ్లోకి ఆ అమ్మాయికి అపూర్వ స్వాగతం..ఎందుకంటే?

భారత్ - పాక్ సరిహద్దుల్లో ఉన్న గ్రామాల్లో బాడ్మేర్ ఒకటి. ఆ చిన్న గ్రామానికి చెందిన ప్యారీ ఆ ఊరి వారు ఎవరూ ఊహించలేనిది సాధించింది. ఆడపిల్లల స్మశానంగా పిలిచే తమ ఊరి ఇమేజ్ ను పూర్తిగా మార్చేయటమే కాదు.. కొత్త ఆశలకు తెర తీస్తూ.. ఆమె ఏకంగా లెఫ్టినెంట్ హోదాలో ఉద్యోగాన్ని సొంతం చేసుకున్నారు. మెడికల్ విభాగంలో ఆమె ఈ హోదాను సొంతం చేసుకున్నారు. అలా ఉద్యోగాన్ని సొంతం చేసుకున్న తర్వాత తొలిసారి ఊరికి వచ్చిన ఆమెకు ఘన స్వాగతం పలికారు.

ఆమె తండ్రి కిస్తూరా రామ్. అతడిది ఆర్మీ బ్యాక్ గ్రౌండే. గతంలో భారతీయ సైన్యంలో పని చేసిన ఆయన 47 ఆర్మీ రెజిమెంట్ లో సుబేదార్ గా రిటైర్ అయ్యారు. తన కంటే తన కుమార్తె ఉన్నత స్థానంలో ఉద్యోగాన్ని సంపాదించటంపై ఆనందంతో ఉక్కిరిబిక్కిరి అవుతున్నారు. ఇది ఆమె ప్రయాణంలో ప్రారంభం మాత్రమేనని.. రానున్న రోజుల్లో మరింత ఎత్తుకు ఎదగటం ఖాయమని చెబుతున్నారు.

జాతీయ స్థాయిలో జరిగిన పరీక్షలో మెరిట్ ఆధారంగా ప్యారీ ఈ జాబ్ ను సొంతం చేసుకున్నారు. ఆమెను చూసిన ఆ ఊరి అమ్మాయిలు తాము కూడా సాధించగలమన్న ఆత్మవిశ్వాసాన్ని సొంతం చేసుకొని.. విజయం సాధిస్తారని ఆశిద్దాం. ఆల్ ద బెస్టు చెబుదామా?