కన్నీళ్లు తెప్పించే ఫొటో.. అందుకే అవార్డుకు ఎంపికైంది

కొన్ని చిత్రాలు మనసును రంజింపజేస్తాయి. మరికొన్ని ఆహ్లాదాన్ని కలిగిస్తాయి. కొన్ని అపురూప చిత్రాలు మాత్రం మన మనసులను కదిలిస్తాయి. కన్నీళ్లు తెప్పిస్తుంటాయి. అలా ప్రకృతి ప్రేమికులను ఎంతగానో ఆకట్టుకొని.. మూగజీవాల కష్టాలను కళ్లకు కట్టిన ఓ ఫొటో ఈ ఏడాది రాయల్ సొసైటీ ఆఫ్ బయాలజీ (ఆర్​ఎస్​బీ) ఫొటోగ్రఫీ పోటీలో మొదటి బహుమతిని గెలుచుకుంది. శ్రీలంకలోని చెత్త డంప్ నుంచి ఓ ఏనుగుల మంద ఆహారపదార్ధాలను ఏరుకొని తింటుండగా ఆ దృశ్యం ఓ ఫొటోగ్రాఫర్​ కంటపడింది. ఇంకే దాన్ని తన కెమెరాలో బంధించాడు. ఆ ఫొటో బయటకొచ్చిన క్షణం నుంచి ప్రకృతి ప్రేమికులను ఎంతో కదిలించింది. ప్రస్తుతం అవార్డును తెచ్చిపెట్టింది. ఫ్రీలాన్స్ ఫొటోగ్రాఫర్ తిలక్సన్ తర్మపాలన్ అంపారా జిల్లాలోని వన్యప్రాణుల అభయారణ్యం సమీపంలో ఈ ఫొటోను క్యాప్చర్​ చేశారు. అక్కడి ఏనుగుల దుస్థితిని ఏ చిత్రం కళ్లకు కట్టింది. ఇక్కడ ప్రతి సంవత్సరం వందలాది మంది ఏనుగులు వ్యర్థాలు తిని అనారోగ్యానికి గురై చనిపోతున్నాయి.


ఈ ఫొటోతో స్పందించిన అధికారులు ఏనుగులు సంచరించే ప్రదేశాల్లో చెత్తను వేయడాన్ని నిషేధించారు. అయితే ఈ ఏడాది రాయల్​ సొసైటీ ఆఫ్​ బయాలజీ అనేక ఫొటోలను పరిశీలించగా ఈ ఫొటో మొదటి బహుమతికి ఎంపికైంది. ఈ ఫొటోకు 1,000 డాలర్లు (రూ.72వేలుపైనే) ప్రైజ్ మనీ లభించింది. ‘నేను ఈ అవార్డు గ్రహీత అయినందుకు గర్వపడుతున్నాను. ఫొటోగ్రాఫర్లలో ఈ అవార్డు నా ఆత్మవిశ్వాసాన్ని మెరుగుపరుస్తుంది. నా భవిష్యత్ ప్రాజెక్టులకు మరిన్ని బాధ్యతలను ఇస్తుంది’ అంటూ ఫొటోగ్రాఫర్ తర్మపాలన్ ట్వీట్ చేశారు. ఈ ఫొటోను షేర్ చేసిన తరువాత నెటిజన్ల నుండి ప్రశంసలను అందుకున్నారు. ప్రస్తుతం జంతుప్రేమికులంతా తర్మపాలన్​ను అభినందిస్తున్నారు.