అన్నీ మర్చిపోతున్నారా! అయితే మీ పని మటాషే!

‘భలేభలే మగాడివోయ్​’ చిత్రంలో హీరో నాని అన్నీ మర్చిపోతూ ఉంటాడు. మతిమరుపు కథాంశంగా తెరకెక్కిన ఈ సినిమా భారీ విజయాన్ని నమోదు చేసుకున్నది. అది సినిమా కాబట్టి మనమూ దాన్ని ఫన్నీగా తీసుకున్నాం. అయితే నిజజీవితంలో మతిమరుపు ప్రధాన లక్షణంగా ఉండే అల్జీమర్స్​ అనేది ఓ పెద్ద వ్యాధి అని ఎంతమందికి తెలుసు. ఆ వ్యాధితో ప్రపంచవ్యాప్తంగా కొన్ని కోట్ల మంది బాధపడుతున్నారని ఎవరన్నా ఊహించారా? 2050 నాటికి 15.2 కోట్ల మంది ఈ వ్యాధి (అల్జీమర్స్​) బారిన పడతారని ఓ నివేదిక వెల్లడించింది. ఇది నిజంగా ఆందోళన చెందవలసిన విషయం. మన ఇంట్లో చాలా మంది పెద్దవాళ్లు ఈ సమస్యతో బాధపడుతూ ఉంటారు. వయసు మీద పడ్డప్పడు ఈ మతిమరుపు కామనే అని మనం లైట్​ తీసుకుంటాం. కానీ ఆ వ్యాధి ముదిరి వాళ్ల ప్రాణాలనే హరించి వేస్తుంది అనేది ఓ చేదు వాస్తవం. మన ఇండ్లల్లో ఉండే పెద్దవాళ్లు చొక్కాలకు గుండీలు పెట్టుకోవడం మర్చిపోతుంటారు. ఎవరన్నా తిట్టినా పట్టించుకోరు? తిండి తినడం మొదలుకొని ప్రతివిషయం మర్చిపోతుంటారు.. అయితే ఈ లక్షణాలన్ని అర్జీమర్స్​వే అంటున్నారు శాస్త్రవేత్తలు. 45 ఏళ్ల వయస్సులో ఈ వ్యాధి లక్షణాలు మొదలవుతాయి. 65 దాటకా తీవ్రస్థాయికి చేరుకుంటాయి.

మనదేశంలో ఎంతమంది?

130 కోట్ల మంది జనాభా ఉన్న భారతదేశంలో 40 లక్షల మంది అల్జీమర్స్‌ రోగులు ఉన్నారన్నది ఆ భయంకరమైన నిజం.
అల్జీమర్స్​ రోగుల్లో చైనా, అమెరికాల తర్వాతి స్థానం మనదే. 2030 నాటికి దేశంలో అల్జీమర్స్‌ వ్యాధిగ్రస్తుల సంఖ్య 75 లక్షలకు చేరుకుంటుందని శాస్త్రవేత్తలు భావిస్తున్నారు. పసుపు వాడకంతో మనదేశంలో ఈ వ్యాధి తీవ్రత తక్కువగా ఉందని కొన్ని పరిశోధనలు చెబుతున్నాయి. మతిమరుపు ముదిరితే ఈ అల్జీమర్స్​ సమస్య వస్తుంది. దీనికి ప్రత్యేకమైన చికిత్స కూడా అందుబాటులో లేదు. వ్యాధిని కొంతమేర నియంత్రించవచ్చు. అయితే 65 ఏళ్లు వచ్చేవరకు ఈ వ్యాధి ఉన్నట్టు మనమే గుర్తించం.

ప్రతి మతిమరుపు.. అల్జీమర్స్​ కాదు
అయితే మతిమరుపు ఉన్నంత మాత్రాన దాన్ని అల్జీమర్స్​గా పరిగణించలేం. పార్కిన్‌సన్స్‌ వ్యాధి, మెదడుకు తీవ్రమైన దెబ్బ తగలడంతో కూడా మనకు మతిమరుపు సంభవించవచ్చు అయితే అల్జీమర్స్​కు కూడా మతిమరుపే ప్రధాన లక్షణం. మనకు వచ్చిన మతిమరుపు అల్జీమర్స్​ అవునో కాదో తెలుసుకోవాలంటే డాక్టర్​ను సంప్రదించాల్సిందే. మాట, రాతల్లో సమస్యలు ఏర్పడటం, వ్యక్తిగత శుభ్రత లోపించడం, ప్రాంతాలకు సంబంధించిన విషయాలు గుర్తులేకపోవడం వంటివన్నీ అల్జీమర్స్‌ లక్షణాలుగా పరిగణించవచ్చు. భావోద్వేగాల్లో మార్పులు, బంధు మిత్రులకు దూరంగా ఉండటం కూడా ఈ వ్యాధి సమస్యలే. మెదడు కణజాలాన్ని పరీక్షిస్తేనే అల్జీమర్స్​ వ్యాధిని నిర్ధారించగలం. అంటే మరణం తర్వాతే వ్యాధిని గుర్తించగలమన్నమాట. కుటుంబ చరిత్ర, జన్యుపరీక్షల ఆధారంగా కూడా వ్యాధిని నిర్ధారించుకోవచ్చు. ఎంఆర్​ఐ. సీటీ స్కాన్​, పీఈటీ వంటి స్కాన్ల ద్వారా మెదడు నిర్మాణం, అందులోని తేడాలను తెలుసుకుంటారు. వీటన్నింటి ఆధారంగా వైద్యులు తుది నిర్ణయానికి వస్తారు. ధూమపానానికి దూరంగా ఉండటం, క్రమం తప్పకుండా వ్యాయామం చేయడం, మెదడకు మేతపెట్టే ఫజిల్స్​లాంటివి పూర్తిచేయడం, వంటి జాగ్రత్తలతో ఆ రోగాన్ని దరిచేరకుండా చేసుకోవచ్చు.