టీటీడీ ఈవో నియామకంపై ఎట్టకేలకు పవన్ స్పందన

తెలుగు నేలపై ఉన్న సుప్రసిద్ధ తిరుమల తిరుపతి దేవస్థానం (టీటీడీ) ఈవోగా బాధ్యతలు చేపట్టేందుకు సమర్థుడైన ఐఏఎస్ అధికారులు దక్షిణ భారతదేశంలో లేరా... అలాంటివారు ఒక్కరు కూడా ఆంధ్రప్రదేశ్ ముఖ్యమంత్రి చంద్రబాబుకు దొరకలేదా? అని జనసేన అధినేత పవన్‌ కల్యాణ్‌ నిలదీశారు. టీటీడీ ఈవోగా అనిల్‌ కుమార్‌ సింఘాల్‌ నియామకంపై ఆయన ట్వీట్లతో విరుచుకుపడ్డారు. ఏపీ ప్రభుత్వాన్ని నిలదీశారు. టీటీడీ ఈవోగా ఉత్తరాదికి చెందిన ఐఏఎస్‌ ను ఎందుకు నియమించాల్సి వచ్చిందో దక్షిణాది ప్రజలకు ఆంధ్రప్రదేశ్‌ ప్రభుత్వం సమాధానం చెప్పాలని ఆయన డిమాండ్‌ చేశారు.

టీటీడీ ఈవోగా ఉత్తరాదికి చెందిన ఐఏఎస్ అధికారి బాధ్యతలు చేపట్టడాన్ని తాను వ్యతిరేకించనని.. కానీ ఉత్తరాదిలోని అమర్‌ నాథ్‌, వారణాసి, మధుర లాంటి దేవాలయాల్లో దక్షిణాదికి చెందిన ఐఏఎస్ అధికారిని ఈవోగా నియమిస్తారా? అలా ఎందుకు నియమించడంలేదు? అలాంటప్పుడు మనం ఎందుకు వారిని నియమించాలి? అని ఆయన నిలదీశారు. అంతేకాదు.. పత్రికల్లో వచ్చిన పలు క్లిప్పింగులనూ ఆయన ట్వీట్ చేశారు.

కాగా పవన్ ఈ విషయంపై స్పందించానికి ముందు ఓ ఐఏఎస్ అధికారి దీనిపై పవన్ స్పందించాలంటూ కోరడం.. పవన్ స్పందించడం ఆసక్తికరంగా మారింది. ఐఏఎస్ అనిల్ కుమార్ సింఘాల్ ను ఏపీ ప్రభుత్వం నియమించడం పట్ల దక్షిణాది రాష్ట్రాల ఐఏఎస్ అధికారులు అభ్యంతరం వ్యక్తం చేశారు. తాజాగా ఓ ఐఏఎస్ అధికారి దీనిపై మాట్లాడుతూ... జనసేన అధినేత పవన్ కల్యాణ్ స్పందించాలని... పవన్ ఇంతవరకు స్పందించకపోవడం ఆశ్చర్యం కలిగిస్తోందని అన్నారు. అనేక విషయాల పట్ల స్పందించే పవన్ దీనిపైనా స్పందించాలని ఆయన కోరగా... పవన్ తాజాగా దీనిపై స్పందించి ట్విట్టర్లో ప్రభుత్వాన్ని నిలదీశారు.

Like Us on Facebook : https://www.facebook.com/Tupakidotcom/