పాక్​ వంకర బుద్ధి.. జాదవ్ ​కు భారత లాయర్​ ను పెట్టలేమంటూ పేచీ

పాకిస్థాన్​ మరోసారి తన వంకరబుద్ధిని చాటుకుంది. గూఢచర్యం ఆరోపణలతో పాకిస్థాన్​ జైళ్లో బందీగా ఉన్న భారత నౌకాదళ మాజీ అధికారి కులభూషణ్​ జాదవ్ ​కు భారతీయ లాయర్​ ను పెట్టలేమంటూ తేల్చి చెప్పింది. కులభూషణ్​ జాదవ్ ​ను పాక్​ చెరనుంచి విడిపించేందుకు కొంత కాలంగా భారత్​ తీవ్రంగా ప్రయత్నిస్తున్న విషయం తెలిసిందే. ఈ క్రమంలో జాదవ్​ తరఫున వాదించేందుకు భారతీయ లాయర్లకు అనుమతి ఇవ్వాలని భారతవిదేశాంగ శాఖ విజ్ఞప్తి చేసింది. కానీ కుటిల బుద్ధిని ప్రదర్శించిన పాక్​.. ఈ ప్రతిపాదనను తోసిపుచ్చింది. ఇదిలా ఉండగా ఆదేశ విదేశాంగ ప్రతినిధి జహీద్​ హఫీజ్​ మరోసారి భారత్​పై తన అక్కసును వెళ్లగక్కారు. ‘ జాదవ్​ కేసు విషయం లో భారత్​ అత్యుత్సాహం ప్రదర్శిస్తోంది. తమ న్యాయవ్యవస్థనే శంకిస్తోంది. భారత్​ పెట్టే అర్థంలేని డిమాండ్లను తాము పట్టించుకోం. పైగా భారత్​ మా కోర్టులను గౌరవించడం లేదు. వారి ప్రతిపాదనలను అంగీకరించే ప్రసక్తే లేదు’ అని హఫీజ్​ పేర్కొన్నారు

పాక్​మీడియాలో తప్పుడు వార్తలు
జాదవ్​ తరఫున న్యాయవాదిని నియమించుకొనేందుకే గతంలోనే పాకిస్థాన్​ అవకాశం కల్పించింది.. కానీ ఆ అవకాశాన్ని భారత్​ వినియోగించుకోలేదని పాకిస్థాన్​ మీడియా తప్పుడు వార్తలు ప్రసారం చేసింది. అయితే తమకు అటువంటి సమాచారం ఏదీ రాలేదని భారత్​ స్పష్టం చేసింది.

కేసు పూర్వాపరాలు..
ఈ కేసును విచారించిన ఇస్లామాబాద్​ హైకోర్టు.. జాదవ్​ కేసు లో న్యాయవాదిని నియమించుకొనేందుకు అవకాశం కల్పించాలని పాకిస్థాన్​ ప్రభుత్వానికి ఆదేశించింది. భారత్ ​కు ఆ మేరకు సమాచారం అందించాలని కూడా కోరింది. తదుపరి విచారణను అక్టోబర్ 3కి వాయిదా వేసింది. ఈ నేపథ్యంలో న్యాయవాది నియామకం కోసం భారత్​.. పాక్​ కు విజ్ఞప్తి చేయగా.. పాకిస్థాన్​ మాత్రం కోర్టు ఆదేశాలను పట్టించుకోకుండా భారత్​ ప్రతిపాదనలను తోసిపుచ్చింది. ఈ కేసుపై తొలి నుంచి అనేక వివాదాలు నెలకొని ఉన్నాయి. గూఢచర్యం ఆరోపణలు ఎదుర్కొన్న జాదవ్​కు పాకిస్థాన్​ కోర్టు మరణదండన విధించగా.. భారత్​ అంతర్జాతీయ న్యాయస్థానాన్ని ఆశ్రయించి మరణదండనపై స్టే తీసుకొచ్చింది.