ఒబామాను నిరుత్సాహం ఆవరిస్తే ఏం చేస్తారంటే..

నమ్మకాలు ప్రతి మనిషికి ఉంటాయి. అందుకు ప్రపంచానికి పెద్దన్న అయిన అమెరికా అధ్యక్షుడు బరాక్ ఒబామా కూడా అతీతుడు కాదన్న విషయాన్ని ఆయన తనకు తాను చెప్పుకున్నారు. కోట్లాది మంది హిందువులు పూజించే అంజనేయస్వామి అమెరికా అధ్యక్షుడికి కొండంత ధైర్యాన్ని ఇవ్వటమే కాదు.. నిరుత్సాహం నిండా ఆవరిస్తే.. కొత్త శక్తినిస్తాడట. నిజానికి ఇలాంటి మాటలు ఏ హిందూ నాయకుడి నోటి వెంట రావాలే కానీ.. ప్రపంచానికి పెద్దన్న నోటి నుంచి రావటమేమిటన్న ఆశ్చర్యం అక్కర్లేదు.

ఎందుకంటే.. ఒబామాకు అంజనేయస్వామి అంటే కాస్త గురి. ఆయన కెరీర్ తొలినాళ్లలో హిందూమత ప్రభావం ఎక్కువగా ఉన్న ఇండోనేషియా (ఇప్పుడు ముస్లిం దేశం) లో గడిపారు. అక్కడ ఆయనకు ఆంజనేయస్వామి గురించి తెలిసింది. తన జేబులో హనుమాన్ బొమ్మ ఉంటుందన్న విషయాన్ని ఒబామా తాజాగా చెప్పుకొచ్చారు. తన వెంట ఎప్పుడూ ఉండే వాటి గురించి చెప్పుకొచ్చిన ఒబామా.. ‘‘హనుమాన్ విగ్రహంతో పాటు.. పోప్ ఫ్రాన్సిస్ నుంచి అందుకున్న ప్రార్థన పూసలు.. బౌద్ధ సన్యాసి ఇచ్చిన బుద్ధుడి ప్రతిమ.. ఇతియోపియా నుంచి సేకరించిన శిలువ గుర్తు నా వెంట ఎప్పుడూ ఉంటాయి’’ అని చెప్పుకొచ్చారు. అయితే.. తనకు నిరుత్సాహం నిండా ఆవరిస్తే హనుమాన్ విగ్రహాన్ని పట్టుకుంటానని ఒబామా వెల్లడించటం గమనార్హం.