ట్రాఫిక్ పోలీసులను చూసి ఇకపై కంగారు వద్దు!

బైక్ పై హుషారుగా వెళ్లిపోతున్న సమయంలో సడన్ గా రోడ్డుపై వైట్ అండ్ వైట్ లో ట్రాఫిక్ పోలీసులు కనిపిస్తారు. అంతే.. ఉన్నట్లుండి బాడీలో అసంకల్పిత ప్రతీకార చర్య ఒకటి జరిగిపోతుంది. పాకెట్ లో డ్రైవింగ్ లైసెన్స్ ఉందా - ఆర్ సీ - సీబుక్ ఇవన్నీ ఉన్నాయా లేదా? లేకపోతే లక్ష్మీదేవి జారిపోతుంది.. ఆ వైట్ అండ్ వైటి చేతిలో పడిపోతుంది. అలవాటులేనివాళ్లైతే.. ఈ టెన్షన్స్ మధ్యలో ఏ డివైడర్ కో - పక్కనున్న వాహనానికో - వెనకనున్న బండికో డ్యాష్ ఇచ్చేస్తారు. అయితే ఇకపై అలాంటి టెన్షన్స్ ఏమీ వద్దంటుంది "డీజీ లాకర్".

తరచూ డ్రైవింగ్ లైసెన్స్ - రిజిస్ట్రేషన్ సర్టిఫికేట్ లను మర్చిపోయి బయటకు వెళ్లి ఇబ్బందులు పడే సమస్య ఇకపై ఉండదు! దీనికోసం కేంద్ర ప్రభుత్వం త్వరలో "డిజీ లాకర్" అనే యాప్ ను ప్రవేశపెట్టనుంది. ఈ యాప్ ద్వారా ఏ ప్రాంతం నుంచి అయినా మొబైల్ ను ఉపయోగించి బండి కాగితాలను చూసుకోవచ్చు. ట్రాఫిక్ పోలీసులు - వాహనాలతో ప్రమేయం ఉన్న వేరే కేసులను దర్యాప్తు చేస్తున్న అధికారులూ ఈ యాప్ ద్వారా వ్యక్తుల వివరాలను కూడా తెలుసుకోవచ్చట.

ఒకటి రెండు రోజుల్లో విడుదల కాబోతున్న ఈ "డిజీ లాకర్" యాప్ ను ఇన్ స్టాల్ చేసుకున్న తర్వాత అకౌంట్ ఓపెన్ చేయడానికి ఆధార్ కార్డు నంబర్ ను మొబైల్ నంబర్ తో లింక్ చేయాల్సి ఉంటుంది. అన్నీ అనుకూలంగా జరిగితే ఈ యాప్ ను ఐటీ - రవాణా శాఖల మంత్రులు త్వరలోనే విడుదల చేయనున్నారు.