16 కిలోమీటర్లు సైకిల్ తొక్కిన బాలయ్య

సినిమాల్లో రకరకాల ఫీట్లు చేసి, పంచ్ డైలాగులు వేసి అభిమానులు సంతోషపరిచే నందమూరి బాలకృష్ణ నిజజీవితంలోనూ తన సినీ, రాజకీయ అభిమానులను పులకింపజేశాడు. హిందూపురం ఎమ్మెల్యే నందమూరి బాలకృష్ణ సినిమాల్లోనే కాదు నిజ జీవితంలోనూ తాము ప్రాక్టికల్ గా ఉంటాం అని నిరూపించాడు. తన నియోజకవర్గంలో 16 కిలోమీటర్ల దూరం సైకిల్ తొక్కి బాలయ్య తన స్టామినా చాటాడు.

అనంతపురం జిల్లాలో ఈ వారంలో లేపాక్షి ఉత్సవాలు జరగనున్నాయి. ఈ నేపథ్యంలో లేపాక్షి ఉత్సవాలను విజయవంతం చేయాలని నిర్వహిస్తున్న ర్యాలీకి జెండా ఊపిన బాలకృష్ణ తను కూడా ఓ సైకిల్ తీసుకుని ర్యాలీతో పాటుగా వెళ్లి అందరిలోనూ ఉత్సాహం నింపాడు. ఏదో ఫొటోలకు ఫోజు ఇచ్చి వదిలేయకుండా చిలమత్తూరు మండలం కొరికొండ చెక్ పోస్టు నుండి లేపాక్షిలోని నంది విగ్రహం వరకు 40 నిమిషాలలో సైకిల్ తొక్కి అందరినీ ఆశ్చర్యచకితులను చేశారు. ఒక స్టార్ హీరో ఈ ఫీట్ చేయడం సామాన్యమైన విషయం కాదు కదా !