మద్యం తరలిస్తూ పట్టుబడిన ఎమ్మెల్యే సోదరుడి కొడుకు

ఏపీలో ఇప్పుడు మద్యం కాసులు కురిపిస్తోంది. మద్యపాన నిషేధం దిశగా ఆలోచిస్తున్న జగన్ సర్కార్ ధరలను భారీగా పెంచడంతో పక్కరాష్ట్రాల నుంచి చీప్ మద్యం అక్రమంగా రవాణా చేస్తూ చాలా మంది కాసులు కురిపించుకుంటున్నారు. ఈ క్రమంలోనే అధికార పార్టీకి చెందిన వారు కూడా ఇందులో బయటపడుతుండడం కలవరం రేపుతోంది.

తాజాగా మద్యం అక్రమ రవాణా కేసులో కర్నూలు జిల్లాకు చెందిన ఓ ఎమ్మెల్యే సోదరుడి కుమారుడు పట్టుబడిన విషయం ఆలస్యంగా వెలుగులోకి వచ్చింది. కర్నూలు నుంచి గోర్లంట్లకు నెంబర్‌ ప్లేట్‌ లేని బైక్‌పై ఓ వ్యక్తి వెళుతుండగా పోలీసులు అదుపులోకి తీసుకున్నారు. మద్యం సేవించి ఉన్న ఆ వ్యక్తి తన పేరు మధు అని చెప్పి, తాను ఎమ్మెల్యే సోదరుడి కొడుకునని హల్‌చల్‌ చేశాడు. బైక్‌లో ఉన్న 9 మ్యాక్‌ డోల్‌ విస్కీ క్వార్టర్‌ బాటిళ్లను పోలీసులు స్వాధీనం చేసుకుని, మధును పోలీస్‌స్టేషన్‌కు తరలించారు.

విషయం తెలుసుకున్న అధికార పార్టీకి చెందిన నాయకులు, సదరు ఎమ్మెల్యే పోలీసులపై ఒత్తిడి తెచ్చినట్లు సమాచారం. ఈ క్రమంలో రాత్రి పొద్దు పోయే వరకు గూడూరు మండలం నాగలాపురం పోలీసులు కేసు నమోదు చేయలేదు. విషయం బయటకు పొక్కడంతో చేసేది లేక ఎక్సైజ్‌ చట్టం కింద కేసు నమోదు చేశారు.