మీ డ్యూటీలు మీ దేవాలయాల వద్ద చేసుకోండి.. ఎంఐఎం కార్పొరేటర్!

కరోనా కష్ట కాలంలో ప్రాణాలని సైతం పణంగా పెట్టి విధులు నిర్వర్తిస్తున్న పోలీసులపై కొందరు దురుసుగా ప్రవర్తిస్తున్నారు. నిన్న బైక్ ఆపినందుకు ఒక వ్యక్తి నోటికొచ్చిన బూతులు తిట్టి పోలీసుల మీద చెయ్యెత్తాడు . ఇక తాజాగా ఎంఐఎం కార్పొరేటర్, అతని అనుచరులు పోలీసులపై రెచ్చిపోయారు. మాదన్నపేట్ పోలీసుస్టేషన్ పరిధిలోని చావని ప్రాంతంలో బందోబస్తు చేస్తున్న ఇద్దరు కానిస్టేబుళ్లపై కార్పొరేటర్ బెదిరింపులకు పాల్పడ్డారు. మసీదు వద్ద జరిగిన ఈ ఘటనకు సంబంధించిన వీడియో ప్రస్తుతం సోషల్ మీడియాలో వైరల్ అవుతుంది .

ఈ ఘటన పై పూర్తి వివరాలు చూస్తే .. హిందూ దేవాలయాల వద్ద వెళ్లి డ్యూటీ చేసుకోండి అని మతం రంగు పులుముతూ అనుచిత వ్యాఖ్యలు చేయడమే కాకుండా ‘మిమ్మల్ని సస్పెండ్ చేయిస్తానంటూ’ పోలీసు సిబ్బందికి సవాల్ విసిరాడు. ఇది వైరల్ కావటంతో ఈ విషయం పోలీసు ఉన్నతాధికారుల వరకు వెళ్ళింది. ఇక ఆ ఎంఐఎం కార్పోరేట్‌, అతని అనుచరులపై పోలీసులు కేసు నమోదు చేశారు.

అయితే ఈ విషయంపై కార్పొరేటర్ వాదన మరోలా ఉంది. మసీదుకు తాళం వేయాలంటూ వారు బెదిరించారని చెప్తున్నారు .ఇక తాము మసీదుకు తాళం వెయ్యాల్సిందిగా వచ్చిన పర్మిషన్ లెటర్ చూపించమన్నానని తెలిపారు. దాన్ని చూపించకుండా ప్రజలను బెదరించారని అందుకే కోప్పడ్డానని కార్పొరేటర్ తెలిపారు.