మందుబాబులు దేని గురించి ఎక్కువగా సెర్చ్ చేస్తున్నారంటే?

లాక్ డౌన్ కారణంగా మూతబడ్డ మద్యం దుకాణాలు దాదాపుగా 40 రోజుల తరువాత మళ్లీ ఈ రోజు తెరుచుకున్నాయి. దీనితో మందుబాబుల ఆనందానికి అవధులు లేవు. మళ్లీ లాక్ డౌన్ పొడగిస్తారేమో అని బ్యాగులు తీసుకొని ఓ నెల రోజులకు సరిపడా మద్యం తీసుకునేందుకు బయల్దేరారు. దీంతో వైన్ షాపుల వద్ద ఉదయం నుండే కిలోమీటర్ల మేర క్యూ లైన్లు కనిపిస్తున్నాయి. ఈ పరిస్థితి ఏ ఒక్క రాష్ట్రానికో పరిమితం కాదు. దేశం లోని చాలా మద్యం షాపుల వద్ద ఇదే పరిస్థితి నెలకొంది.

అయితే , కరోనా కట్టడి కోసం లాక్‌ డౌన్ ‌ను మరో రెండు వారాల పాటు పొడిగిస్తూ నిర్ణయం తీసుకున్న కేంద్ర ప్రభుత్వం ఆరెంజ్, గ్రీన్ జోన్లలో మాత్రమే మద్యం విక్రయాలకు అనుమతినిచ్చిన విషయం తెలిసిందే. ఈ క్రమంలో గూగుల్ ‌లో ఒక రకమైన సెర్చింగ్ పెరిగింది. ఏయే ప్రాంతాలు ఏయే జోన్లలో ఉన్నాయి. మనకు దగ్గరగా ఉన్న వైన్ షాపులేవి.. రీఓపెన్ చేసిన వైన్ షాపుల జాబితా. ఇలాంటి అంశాల కోసం ఎక్కువగా సెర్చ్ చేస్తున్నారు.

దీంతో సోమవారం ఉదయం నుంచి ఆయా అంశాలు గూగుల్‌ లో ట్రెండ్ అవుతున్నాయి. నగరాల్లో నివాసం ఉంటున్న వారు ఎక్కువగా ఇలాంటి అంశాల కోసం వెతుకుతున్నారు. తమకు సమీపంలో ఉన్న వైన్ షాపుల గురించి తెలుసుకొని అక్కడికి వెళ్లి క్యూలో నిల్చుంటున్నారు. ఈ విషయం తెలుసుకోవడానికి గూగుల్ ‌లో పలు రకాలుగా శోధిస్తున్నారు. కొంత మంది మద్యంప్రియులు ముందుగా నగరంలో కంటెయిన్ ‌మెంట్ జోన్లు ఏవో తెలుసుకొని ఆయా ప్రాంతాలను మినహాయించి మిగిలిన ప్రాంతాల్లో ఎక్కడెక్కడ వైన్ షాపులు ఉన్నాయో తెలుసుకుంటున్నారు. చాలా చోట్ల మద్యం కోసం ఎగబడుతున్నారు. సామాజిక దూరం ప్రశ్నార్థక మారింది. పలు చోట్ల ఆందోళనకర పరిస్థితులు నెలకొన్నాయి. ముఖ్యంగా పలు వైన్ షాపుల వద్ద మగవాళ్లతో పాటు మహిళలు, యువతులు కూడా క్యూ లైన్లో నిల్చొని ఉన్న దృశ్యాలు సోషల్ మీడియాలో తెగ వైరల్ అవుతున్నాయి.