బయోపిక్ మీద ఆ మాజీ సీఎం ముచ్చట

బాలీవుడ్ లో బయోపిక్ ల జోరు ఏ రేంజ్ లో ఉందో తెలిసిందే. ఒక దాని తర్వాత ఒకటిగా వస్తున్న బయోపిక్ లు రావటం.. అవన్నీ సక్సెస్ ఫుల్ కావటమే కాదు.. సరికొత్త ఇమేజ్ క్రియేట్ చేసేలా ఉండటం ఆర్జేడీ అధినేత.. మాజీ ముఖ్యమంత్రి లాలూ ప్రసాద్ యాదవ్ దృష్టి పడేలా చేసినట్లుంది. బీహార్ రాజకీయాల్లో చక్రం తిప్పుతున్న లాలూ.. తాజాగా తన మనసులోని కోరికను వెల్లడించారు. తన జీవిత కథ ఆధారంగా తెరకెక్కించే ఏ చిత్రంలో అయినా ప్రధానపాత్రను పోషించేందుకు తాను సిద్ధంగా ఉన్నట్లుగా వెల్లడించారు.

యాక్టింగ్ విషయంలో పేరున్న సినీ నటులకు తాను ఏ మాత్రం తీసిపోనని చెప్పిన ఆయన.. తన బయోపిక్ లో తానే నటిస్తానని ఓపెన్ ఆఫర్ ఇచ్చేస్తున్నారు. ఇంతకీ సినిమా ముచ్చట లాలూ నోటి వెంట రావటానికి కారణం లేకపోలేదు. తాజాగా ఆయన మదారి మూవీ ప్రమోషన్ లో భాగంగా హీరో ఇర్ఫాన్ ఖాన్ ఆయన్ను కలిశారు. ఈ సందర్భంగా తన మనసులోని మాటను చెప్పేసి లాలూ.. ఇర్ఫాన్ కు మరో బాధ్యతను అప్పజెప్పారు. ఒకవేళ.. ఎవరైనా తన బయోపిక్ ను తీయదలిస్తే.. తన పాత్రకు తాను రెఢీ అని చెప్పిన ఆయన.. ఆ సినిమాకు హీరోయిన్ ను ఎంపిక చేయాల్సిన బాధ్యత మాత్రం ఇర్ఫాన్ దేనని తేల్చారు. రీల్ లైఫ్ లో తన పాత్రను తానే నటిస్తానని చెబుతున్న లాలూ.. రియల్ భార్యను వదిలేసి..రీల్ భార్య ఎంపిక గురించి మాట్లాడటం ఏమిటి లాలూ..?