11 కోట్లు ఖర్చు మీద కోడెల రియాక్ట్ అయ్యారు

తాను రాజకీయాల్లోకి వచ్చిన కొత్తల్లో ఎన్నికల ఖర్చు చాలా పరిమితంగా ఉండేదని.. కానీ తాజాగా జరిగిన సార్వత్రిక ఎన్నికల్లో మాత్రం రూ.11కోట్ల మేర తనకు ఖర్చు అయినట్లుగా ఏపీ స్పీకర్ కోడెల శివప్రసాద్ ఒక మీడియా ఛానల్ కు ఇచ్చిన ఇంటర్వ్యూలో చెప్పినట్లుగా వార్తలు రావటం.. దీనిపై ఏపీ విపక్షం ఆయనపై పెద్ద ఎత్తున విమర్శలు చేయటం తెలిసిందే.

చివరకు ఆయన ఇంటర్వ్యూ పాఠాన్ని ఎన్నికల సంఘానికి ఫిర్యాదు రూపంలో అందజేశారు కూడా. ఈ విషయం మీద వివాదం రేగుతున్నా దాదాపు రెండు వారాలుగా పెదవి విప్పని ఏపీ స్పీకర్ కోడెల.. తాజాగా మాత్రం ఈ అంశంపై స్పందించారు. మీడియా సమావేశంలో మాట్లాడిన ఆయన.. తన ఎన్నికల ఖర్చు రూ.11 కోట్లు అవుతుందని తాను చెప్పలేదని కోడెల స్పష్టం చేశారు. గత ఎన్నికల్లో గెలవటానికి రూ.11 కోట్లు ఖర్చు అయ్యిందని ఎవరో తనతో చెప్పిన విషయాన్ని మాత్రమే తాను ప్రస్తావించానే తప్ప.. తాను ఖర్చు చేసినట్లుగా చెప్పలేదన్నారు. ఈ విషయం మీద లేనిపోని ప్రచారం చేస్తున్నారన్న ఆయన.. గుడ్డు మీద ఈకలు పీకే పని చేస్తున్నారంటూ మండిపడ్డారు.