టీచర్ ఎమ్మెల్సీ ఎన్నికల్లో కల్పలత విజయం

కృష్ణా-గుంటూరు జిల్లాల ఉపాధ్యాయ ఎమ్మెల్సీలో కల్పలత విజయం అందుకున్నారు. రెండో ప్రాధాన్యత ఓట్ల లెక్కింపులో బొడ్డు నాగేశ్వరరావుపై కల్పలత విజయం సాధించింది. తన విజయానికి కావాల్సిన 50 శాతం ఓట్లు దాటడంతో కల్పలత గెలుపు ఖారారైంది. 6,153 ఓట్లు దాటగానే కల్పలత గెలిచినట్లు అధికారులు ప్రకటించారు. ఈ ఎమ్మెల్సీ స్థానానికి 19 మంది అభ్యర్థులు పోటీ చేయగా.. 12,554 మంది ఓటు హక్కును వినియోగించుకున్నారు.

మొదట ప్రాధాన్యత ఓట్ల లెక్కింపులో ఏ అభ్యర్థికి 6,153 ఓట్లు రాకపోవడంతో..రెండవ ప్రాధాన్యత లెక్కింపులో కల్పలతను విజేతగా అధికారులు ప్రకటించారు. ఎన్నికల్లో విజయం అనంతరం కల్పలత మీడియాతో మాట్లాడారు. తన విజయం కోసం కృషి చేసిన అందరికీ ఆమె ప్రత్యేకమైన ధన్యవాదాలు తెలిపారు. ముఖ్యంగా మహిళా ఉపాధ్యాయులకు ప్రత్యేకంగా కృతజ్ఞతలు చెప్పారు కల్పలత. తాను స్థానికురాలిని కాదనే అభిప్రాయం ఎక్కడా వినిపించలేదని.. ఉపాధ్యాయుల సమస్యల పరిష్కారం కోసం పనిచేస్తానని ఆమె తెలిపారు.