త్వరలో హైదరాబాద్​కు పాల్​.. ఇక కామెడీకి కొదువుండదు..

ప్రజాశాంతి పార్టీ అధ్యక్షుడు, ప్రముఖ మతగురువు కేఏ పాల్ అతి త్వరలో హైదరాబాద్​ వస్తున్నాడట. గ్రేటర్​ ఎన్నికల సందర్భంగా కేఏ పాల్​ ఓ వీడియోను విడుదల చేశారు. ఈ సందర్భంగా ఆయన పలు ఆసక్తికర వ్యాఖ్యలు చేశారు. ప్రజలు ఓట్లను అమ్ముకోవద్దని .. సరైన వ్యక్తిని ఎన్నుకోవాలని సూచించారు. ఈ ప్రజలంతా కులాలకు, మతాలకు అతీతంగా ఓట్లు వేయాలన్నారు. తొందర్లోనే తాను హైదరాబాద్ వస్తున్నా.. అని పాల్​ చెప్పారు. మరోవైపు పాల్​వస్తున్నానని ప్రకటించడంతో సోషల్​మీడియాలో అప్పుడే ఫుల్​ ట్రోలింగ్​ మొదలైంది. పాల్​ హైదరాబాద్​కు వస్తే న్యూస్​చానళ్లకు ఫుల్​ మసాలా దొరుకుతుందని.. తెలుగురాష్ట్రాల ప్రజలకు కావల్సినంత కామెడీ ఉంటుందని పలువురు కామెంట్లు పెడుతున్నారు.

గత ఎన్నికల్లో కేఏపాల్​, బండ్ల గణేశ్​ లాంటి నేతలు రాజకీయాల్లోకి వచ్చి తెలుగువాళ్లకు కావల్సినంత వినోదాన్ని పంచారు. కేఏపాల్​ ఏపీలోని అన్ని నియోజకవర్గాల్లో తన పార్టీ అభ్యర్థులను నిలబెట్టారు. అయితే ఆయనకు ఎక్కడా ఆశించిన స్థాయిలో ఓట్లు రాలేదు.కానీ.. తన మాటలు, చేష్టలతో ప్రజలకు కావల్సినంత వినోదాన్ని పంచారు. ఇప్పటికే ఆయన వీడియోలకు లక్షల్లో వ్యూస్​ ఉంటాయి. అందుకు కారణం ఆయన చేసే కామెడీనే. ఓ మతగురువైన కేఏ పాల్​.. సోషల్​మీడియా దెబ్బకు కామెడీ పీస్​గా మిగిలిపోయారు. ఇటీవల అమెరికా ఎన్నికల్లో ట్రంప్​ ఓడిపోయినప్పటికీ గద్దె దిగేందుకు ఇష్టపడలేదు. ఈ సందర్భంగా తానే ట్రంప్​ దగ్గరకు వెళ్లి ఆయనను ఒప్పిస్తానని.. త్వరలోనే అధికార మార్పిడి జరుగుతుందంటూ పాల్​ చేసిన వ్యాఖ్యలు సంచలనంగా మారాయి.

తనకు 130 దేశాల అధ్యక్షులు తెలుసని వారందరితో నేను తరచూ మాట్లాడతానని పాల్ చెబుతుంటారు. తన పీస్​ మిషన్​ ఇండియాలోకి రాకుండా కొన్ని శక్తులు ఆపుతున్నాయని కూడా పాల్​ తరుచూ అంటుంటారు. ఆయన మాటల్లోని నిజానిజాలు ఆ జీసస్​కే తెలియాలి. ఏది ఏమైనా కేఏ పాల్​ పేరు చెబితేనే పగలబడి నవ్వేవాళ్లు తెలుగునాట చాలామంది ఉన్నారు. ఇక ఆయన హైదరాబాద్​కు ఎంట్రీ ఇచ్చారంటే మళ్లీ కామెడీ స్టార్​ అయినట్టే.