ఇలాంటి కస్టమర్లు తగిల్తే ప్రతిరోజూ పండగే..!

కొంతమంది దయార్ద హృదయులైన కస్టమర్లు అప్పుడప్పుడు రెస్టారెంట్లకు వస్తుంటారు. అక్కడ పనిచేసే సిబ్బందిపై జాలితో భారీగా టిప్​లు ఇస్తుంటారు. చాలా మంది కస్టమర్లు మాత్రం విసుక్కుంటూ టిప్​ ఇస్తారు. వేలకు వేలకు రెస్టారెంట్​కు బిల్లు కడతారు.. కానీ అక్కడ వడ్డించేవాడికి ఓ వంద రూపాయలు ఇచ్చేందుకు వందసార్లు ఆలోచిస్తుంటారు.

కానీ అమెరికాలోని ఓ హోటల్​కు వెళ్లిన ఓ ధనవంతుడు .. కేవలం రూ. 500 బిల్లు చెల్లించి.. అక్కడి పనిచేసేవాళ్లకు రూ. 2 లక్షలు టిప్​గా ఇచ్చాడు. హోటల్​లో పనిచేసే సర్వర్​లంతా ఆ టిప్​ను పంచుకోవాలని సూచించాడు. దీంతో వారి ఆనందానికి పట్టపగ్గాలు లేకుండా పోయాయి.

యూఎస్ లోని ఓహియో రాష్ట్రం.. క్లీవ్‌లాండ్‌ నగరంలోని ‘‘నైట్ టౌన్’’ అనే రెస్టారెంట్​ ఉంది. ఆ రెస్టారెంట్​కు ఓ వ్యక్తి తరచూ వస్తుంటాడు. అక్కడ ఉండే డ్రింక్స్​, స్నాక్స్​ అతడికెంతో ఇష్టం. గత ఆదివారం కూడా అలాగే హోటల్​కు వచ్చాడు. ఒక స్టెల్లా డ్రింక్‌ ఆర్డర్‌ చేశారు. రెండు సిప్పులు మాత్రం తాగాడు. ఆ తర్వాత బిల్​ ఇవ్వాలని అడిగాడు. ఏడు డాలర్లు అయింది బిల్​. కానీ సదరు వ్యక్తి మాత్రం ఈ బిల్లుకు మరో 3000 వేల డాలర్లు టిప్​ కలిపి ఇచ్చాడు. సదరు యజమాని ఆశ్చర్యపోయాడు. పొరపాటున అలా ఇచ్చాడేమోనని ఒకటికి రెండు సార్లు చెక్​ చేశాడు. అతడు మొత్తం మూడువేల ఏడు డాలర్లు ఇచ్చినట్టు గమనించాడు. అయితే అతడు రెగ్యులర్​ కస్టమర్​.. పొరపాటున అలా ఇచ్చాడేమోనని భావించాడు.

బయటకు వెళ్లిపోతున్న అతడిని పిలిచాడు. ‘ సార్​ మీరు పొరపాటున 3000 డాలర్లు ఇచ్చారు’ అన్నాడు. కానీ సదరు వ్యక్తి ‘నేను పొరపాటున ఇవ్వలేదు. టిప్​గానే ఇచ్చా. ఈ డబ్బును మీ హోటల్లో పనిచేసే సిబ్బందికి సమానంగా పంచి ఇవ్వండి మెరీ క్రిస్మస్​’ అని చెప్పి వెళ్లిపోయాడు. హోటల్​ యజమాని ఆశ్చర్యపోయాడు. తన సిబ్బందికి ఆ డబ్బును పంచేశాడు.

ఈ సందర్భంగా ఆ హోటల్​ యజమాని బ్రెండన్​ రింగ్​ మీడియాతో మాట్లాడుతూ.. ‘ఓహియో స్టేట్​లో కరోనా కేసులు పెరుగుతున్నాయి. జనవరి వరకు రెస్టారెంట్​ను మూసివేయాలనుకున్నాం. ఈ రోజు (ఆదివారం) చివరిరోజు. మా హోటల్​లో పనిచేసే సిబ్బంది ఎంతో ఆర్థిక ఇబ్బందులు పడుతారని తెలుసు. కానీ ఏం చేయలేని పరిస్థితి. ఇటువంటి పరిస్థితిలో ఓ వ్యక్తి మా హోటల్​కొచ్చి ఇంత టిప్​ ఇవ్వడం నిజంగా నమ్మలేకపోయా. ఆ డబ్బును ఆరోజు డ్యూటీలో ఉన్నవారందరికీ తలా 750 డాలర్లు పంచాను. ఈ రోజుల్లోనూ ఇటువంటి మనుషులు ఉండటం గ్రేట్​’ అని అన్నాడు.