హైదరాబాద్ లో దానికిప్పుడు ఫుల్ డిమాండ్

హైదరాబాద్.. ఇప్పుడు అంతర్జాతీయ సంస్థలకు అనువుగా మారింది. అందుకే ప్రపంచంలోని ప్రఖ్యాత సంస్థలన్నీ ఇక్కడ కార్యాలయాలు ఏర్పాటు చేసేందుకు ఉత్సాహం చూపుతున్నాయి. ఇప్పటికే గూగుల్- అమేజాన్- మైక్రోసాఫ్ట్ లాంటి దిగ్గజ సంస్థలు కార్యాలయాలు ఏర్పాటు చేశాయి. ఇప్పుడు మరెన్నో సంస్థలు తరలివస్తున్నాయి. అంతర్జాతీయ నగరంగా భవిష్యత్ లో హైదరాబాద్ రూపుదిద్దుకునే అవకాశాలు మెండుగా ఉన్నాయంటున్నారు

తాజాగా హైదరాబాద్ మరో అరుదైన ఫీట్ సాధించింది. ఆఫీస్ స్పేస్ లీజింగ్ లో బెంగళూరును వెనక్కి నెట్టి ముందు వరసులో నిలిచింది. ఈ పరిణామం హైదరాబాద్ ఖ్యాతిని ఇనుమడింప చేస్తోందని ప్రాపర్టీ కన్సల్టెంట్ సీబీఆర్ ఈ నివేదికలో పేర్కొంది. హైదరాబాద్ లో అద్దెకిచ్చిన ఆఫీస్ స్పేస్ పెరగడం కూడా మంచి పరిణామమని సీబీఆర్ ఈ నివేదకలో పేర్కొంది.

దేశంలోని తొమ్మిది ప్రధాన నగరాల్లో జనవరి నుంచి మార్చి మధ్యకాలంలో ఆఫీస్ స్పేస్ లీజింగ్ పెరిగింది. 1.28 కోట్ల చదరపు అడుగులకు చేరుకుంది. మేక్ ఇన్ ఇండియా- డిజిటల్ ఇండియా- స్మార్ట్ సిటీ- పారిశ్రామిక కారిడార్లు వంటి దేశీయ- బహుళజాతి కార్పొరేట్ల కార్యకలాపాలు పుంచుకోవడానికి ఇది దోహదపడుతోందని పేర్కొన్నారు.

ఈ జనవరి నుంచి మార్చి వరకు హైదరాబాద్ లో స్పేస్ లీజింగ్ 35 లక్షల చదరపు అడుగులుగా ఉంది. గతేడాది ఇదే సమయంలో కేవలం 11లక్షల చదరపు అడుగులుగా మాత్రమే ఉంది. అంటే మూడింతలు పెరగడం విశేషం. తాజాగా జూన్ వరకు హైదరాబాద్- బెంగళూరు రెండు నగరాల్లో ఆఫీస్ స్పేస్ 2.45 కోట్ల చదరపు అడుగులకు లీజుకు ఇస్తున్నారు. పెరుగుతున్నడిమాండ్ ను దృష్టిలో ఉంచుకొని బిల్డర్లు పెద్ద ఎత్తున కొత్త నిర్మాణాలు చేపడుతూ లబ్ధి పొందుతున్నారు. అంటే గత ఏడాదితో పోలిస్తే ఇది 51శాతం ఎక్కువని ప్రాపర్టీ కన్సెల్టెంట్ సంస్థ కొలియర్స్ ఇంటర్నేషనల్ ఇండియా పేర్కొంది. దేశవ్యాప్తంగా లీజుకు ఇచ్చిన ఆఫీస్ స్పేస్ లో 72శాతం బెంగళూరు- హైదరాబాద్ నగరాల్లోనే అందుబాటులోకి రావడం విశేషం. ఎక్కువగా ఐటీ- బీపీఎం- ఇంజనీరింగ్- ఉత్పత్తి రంగ కంపెనీలు ఈ ఆఫీస్ స్పేస్ ను లీజుకు తీసుకుంటున్నాయి.