హరీశ్ పచ్చ షర్ట్ వేసుకున్నారండోయ్

పచ్చ పార్టీ అంటూ ఏ చిన్న అవకాశం చిక్కినా తెలుగుదేశం పార్టీపై చెలరేగిపోయే తత్వం తెలంగాణ రాష్ట్ర మంత్రి హరీశ్ రావులో ఎక్కువే. తెలుగుదేశం పార్టీ అధినేత చంద్రబాబును.. ఆ పార్టీకి చెందిన నేతల్ని దుమ్ము దులిపే విషయంలో కేసీఆర్ తర్వాత ఎక్కువ మార్కులు పడేవి హరీశ్ రావుకే. తెలుగుదేశం అన్నా.. ఆ పార్టీ నేతలన్నా కోపగించుకునే ఆయన.. పచ్చ పార్టీ అంటూ విమర్శలు చేస్తుంటారు.

అలాంటి హరీశ్.. పచ్చ చొక్కా వేసుకొని తిరుమల మెట్లు ఎక్కటం అందరి దృష్టిని ఆకర్షించిందని చెప్పాలి. తాజాగా ఆయన తిరుమలకు వెళ్లిన విషయం తెలిసిందే. తిరుపతిలోని అలిపిరి నుంచి తిరుమల కొండకు కాలినడకన వెళ్లిన హరీశ్.. ఈ సందర్భంగా పసుపు టీ షర్ట్ వేసుకోవటం గమనార్హం. మిగిలిన విషయాల మాట ఎలా ఉన్నా.. రంగుల విషయంలో ఎప్పుడూ అలెర్ట్ గా ఉండే హరీశ్.. తన వైఖరికి భిన్నంగా ఎల్లో టీ షర్ట్ వేసుకోవటం విశేషంగా చెప్పాలి.

శుభానికి సంకేతంగా పసుపు చొక్కా వేసుకొని ఉండొచ్చంటూ కొందరు వ్యాఖ్యానిస్తున్నారు. ఏమైనా.. పచ్చ పార్టీని తీవ్రంగా వ్యతిరేకించే హరీశ్ వంటి మీద పసుపు చొక్కా కాస్త చిత్రంగా ఉందనే చెప్పక తప్పదు.