పుల్లెల గోపిచంద్​ పై మరోసారి గుత్తా జ్వాలా ఫైర్..

బ్యాడ్మింటన్​ క్రీడాకారిణి గుత్తా జ్వాలా మరోసారి బ్యాడ్మింటన్​ కోచ్​ పుల్లెల గోపిచంద్​పై విరుచుకుపడ్డారు. ఎందరో క్రీడాకారులు రాణించకపోవడానికి కారణం గోపిచందే అని ఆమె ఆరోపించారు. ఆయన తన సొంత అకాడమీ ప్రయోజనాల కోసం పనిచేస్తున్నాడని తీవ్రస్థాయిలో మండిపడ్డారు. బ్యాడ్మింటన్​ చీఫ్​ కోచ్​ అయి ఉండి తన బాధ్యతను విస్మరించి.. అకాడమీని అభివృద్ధి చేసుకోవడానికి ప్రాధాన్యమిస్తున్నారని ఆరోపించారు. ఇటీవల ఓ టీవీ చానల్​కు ఇచ్చిన ఇంటర్వ్యూలో జ్వాలా ఏమన్నారంటే.. ‘ నేను ఏం మాట్లాడినా కాంట్రవర్సి అంటున్నారు. నేను నిజాలను నిర్భయంగా చెబుతున్నాను. అందుకే నేను వివాదాస్పద వ్యాఖ్యలు చేస్తానని నా మీద ఆరోపణలు చేస్తున్నారు. నిజానికి గోపిచంద్​ ఓ స్వార్థపరుడు. అందుకే తెలుగు రాష్ట్రాల నుంచి బ్యాడ్మింటన్​ క్రీడాకారులు బయటకు రావడం లేదు.

ఒలంపిక్స్​ తర్వాతా నేను బయటకొచ్చాక ఎంతో నిరాశపరిచాడు. నాకు ఏ మాత్రం సపోర్ట్​ ఇవ్వలేదు. తన అకాడమీలో కోచింగ్​ తీసుకున్నవాళ్లకు మాత్రమే ఆయన సపోర్ట్​ చేస్తున్నారు. స్పోర్ట్స్​ అథారిటీ ఆఫ్​ ఇండియా జీతం తీసుకుంటూ దేశానికే ద్రోహం చేస్తున్నాడు. ముందు ఆయన తన చీఫ్​కోచ్​ పదవికి రాజీనామా చేసి ఆ తర్వాతా అకాడమీని నిర్వహించుకోవాలి. లేదంటే అకాడమీని మూసేసి కోచ్​ బాధ్యతలనైనా సక్రమంగా విధించాలి’ అంటూ జ్వాలా మండిపడ్డారు. అయితే గోపిచంద్​పై గుత్తా జ్వాలా ఆరోపణలు చేయడం ఇది తొలిసారి కాదు. చాలా ఏళ్లుగా వీరిద్దరి మధ్య వివాదం నడుస్తున్నది.