గంగూలీ బద్ధకస్తుడు.. అతడి వల్లే టీమిండియా విఫలం..! చాపెల్​ వ్యాఖ్యలు..!

భారత క్రికెట్​ జట్టు మాజీ కోచ్​ గ్రేగ్​ చాపెల్​ మరోసారి సంచలన వ్యాఖ్యలు చేశాడు. మిస్టర్​ డిపెండబుల్​ రాహుల్​ ద్రవిడ్​ ను ప్రశంసలతో ముంచెత్తిన చాపెల్​.. బీసీసీఐ అధ్యక్షుడు, టీమిండియా మాజీ కెప్టెన్​ సౌరవ్​ గంగూలీపై నోరు పారేసుకున్నాడు. గంగూలీ బద్దకస్తుడని .. అతడికి టీమిండియా గెలవాలన్న కాంక్ష లేదని.. కేవలం తన కెప్టెన్సీని కాపాడుకోవడానికి మాత్రమే ప్రయత్నించాడని అన్నాడు చాపెల్​. అతడు వ్యాఖ్యలు ప్రస్తుతం వివాదాస్పదంగా మారాయి. నిజానికి చాపెల్​ను తీసుకొచ్చింది సౌరవ్​ గంగూలీయే.. ఈ విషయాన్ని చాపెల్​ కూడా ఒప్పుకున్నాడు.

చాపెల్​ను కోచ్​ గా తీసుకొచ్చి చాలా పెద్ద తప్పు చేశానని.. గతంలో సౌరవ్​ గంగూలీ తన ఆత్మకథ ‘ఏ సెంచరీ నాట్ ఏ ఎనఫ్'‌ లో రాశాడు. అంతేకాక చాపెల్​ కోచ్​ గా ఉన్న సమయంలో పలు వివాదాస్పద నిర్ణయాలు తీసుకున్నాడు. అతడిపై చాలా ఆరోపణలు ఉన్నాయి. అప్పట్లో ఇర్ఫాన్​ పఠాన్​ బౌలర్ గా రాణిస్తున్నాడు.. కానీ అతడిని బ్యాటింగ్​ చేయాలంటూ చాపెల్​ సూచించాడు. దీంతో పఠాన్​.. ఇటు బౌలింగ్​కు అటు బ్యాటింగ్​ కు పనికిరాకుండా పోయాడు. మరోవైపు భారతజట్టు బ్యాటింగ్​ లైనప్​లోనూ చాలా మార్పులు చేశాడు చాపెల్​. అతడి హయాంలోనే గంగూలీని జట్టు నుంచి తప్పించారు. ఆ తర్వాత విమర్శలు రావడంతో మళ్లీ గంగూలీని తీసుకున్నారు.

ఇదిలా ఉంటే తాజాగా గ్రేగ్​ చాపెల్​ మాట్లాడుతూ.. అప్పట్లో తాను తీసుకున్న నిర్ణయాలను సమర్థించుకున్నాడు. రాహుల్​ ద్రవిడ్​ గొప్ప క్రికెటర్​ అని కొనియాడాడు. జట్టును నంబర్​ వన్​ గా తీర్చిదిద్దేందుకు ద్రవిడ్​ ఎంతో కృషి చేశాడని పేర్కొన్నాడు. కానీ అతడికి మిగిలిన క్రికెటర్లు ఎవరూ సహకరించలేదని.. అందుకే 2007 వరల్డ్​కప్​ లో టీమిండియా ఘోరంగా ఓడిపోయిందని పేర్కొన్నాడు.

2005, 07 కాలంలో చాపెల్​ కోచ్​ గా ఉన్నాడు. ఆ టైంలోనే భారతజట్టు ఘోర పరాజయాలను ఎదుర్కొన్నది.

ఇంకా చాపెల్​ ఏమన్నాడంటే..!

‘సౌరవ్​ గంగూలీని జట్టు నుంచి తప్పించడం మంచి నిర్ణయమే. ఎందుకంటే ఈ నిర్ణయం వల్లే చాలా మంది ఆటగాళ్లు దారిలోకి వచ్చారు. నా పదవి కాలం ముగిసిన తర్వాత బీసీసీఐ నన్ను జట్టులో చేరాలని కోరింది. కానీ నేను ఆ ఆఫర్​ ను తిరస్కరించాను’ అని చాపెల్​ పేర్కొన్నాడు.