మార్కెట్ ​యార్డు లో గ్యాంగ్ ​వార్​!

నెల్లూరు మార్కెట్​ యార్డు రక్తసిక్తం అయ్యింది. రెండు గ్యాంగ్​లు రెచ్చిపోయాయి. కత్తులు రాడ్లతో పరస్పరం దాడులు చేసుకున్నాయి. అది గమనించిన కొందరు స్థానికులు పోలీసులకు సమాచారం అందించారు. అయితే అక్కడికి చేరుకున్న పోలీసులు ఖంగుతున్నారు. అది నిజం కొట్లాట కాదని.. ఓ షార్ట్​ఫిలిం తీసేందుకు చేసిన హడావిడి అని గమనించి షాక్​ అయ్యారు. ఏది ఏమైనా న్యూసెన్స్​ క్రియేట్​ చేసి ప్రజలును భయభ్రాంతులకు గురిచేసినందుకు అక్కడ ఉన్న జూనియర్​ ఆర్టిస్టులను, ఆ షార్ట్​ ఫిలిం తీస్తున్నవారిని అదుపులోకి తీసుకున్నారు.

‘మద్రాస్ బస్టాండ్‌’ పేరుతో కొందరు షార్ట్​ఫిలిం తీయాలని నిర్ణయించుకున్నారు. ఇందుకోసం కొందరు జూనియర్​ ఆర్టిస్టులను కూడా పిలిపించారు. అయితే సన్నివేశాలు చాలా సహజంగా రావాలనే ఉద్దేశంతో ఏకంగా నెల్లూరు మార్కెట్​లోనే షూటింగ్​ చేశారు. ఇక్కడ షూటింగ్​ జరుపుతున్నట్టు ప్రజలకు, పోలీసులకు సమాచారం అందించలేదు. దూరంగా కెమెరాలు పెట్టి దృశ్యాలను చిత్రీకరించారు. అయితే ఆర్టిస్టులు ఎంతో సహజంగా కొట్టుకుంటున్నట్టు నటించడంతో స్థానికులు బెదిరిపోయారు. వారు పోలీసులకు సమాచారం అందించడంతో.. పోలీసులు జూనియర్​ ఆర్టిస్టులను లోపలేసి నాలుగు తగిలిస్తే అసలు విషయం చెప్పారు.

ఎక్కడ షూటింగ్​ చేయాలనుకున్నా ముందుగా పోలీసుల అనుమతి తీసుకోవాలని.. ఇష్టారాజ్యంగా షూటింగ్​లు చేస్తూ ప్రజలను ఇబ్బందికి గురిచేయడం సరికాదని పోలీసులు హెచ్చరిస్తున్నారు. ఇటీవల కాలంలో షార్ట్​ఫిలిమ్స్​, ఫ్రాంక్​ వీడియోలు తీసేవారి సంఖ్య ఎక్కువైంది. వీరు ఎవరికి ఇబ్బందులు లేకుండా షూటింగ్​ చేసుకుంటే నష్టం లేదు కానీ ప్రజలను ఇబ్బందులకు గురిచేస్తూ వారి ప్రైవసీకి భంగం కలిగించడం సరికాదని పోలీసులు హెచ్చరిస్తున్నారు. ఫ్రాంక్​ వీడియోలు చేసి కొందరు అమ్మాయిలను వేధిస్తున్నారని ఈ మధ్య ఇటువంటి కేసులు నమోదవుతున్నాయని చెప్పారు. ఇలా చేయడం చట్టవిరుద్ధమని హెచ్చరిస్తున్నారు.