ట్రంప్ ప్రయాణించే బీస్ట్ కారు.. షాకింగ్ ఫీచర్స్

అమెరికా అధ్యక్షుడు డొనాల్డ్ ట్రంప్ ఇండియాకు చేరుకొని మోతేరా స్టేడియంలో ప్రసంగం ముగించారు. ప్రస్తుతం ఆగ్రాలోని తాజ్ మహల్ కు వెళుతున్నారు. ఈ క్రమంలో అహ్మదాబాద్ లో ట్రంప్ దాదాపు 50 కి.మీలు తన నల్లటి కారులోనే వెళ్లారు. అది అలాంటి ఇలాంటి కారు కాదు.. అమెరికా అధ్యక్షుడు ప్రయాణించే అత్యాధునిక, అత్యంత భద్రమైన ‘బీస్ట్’ కారు. దాని పేరు బీస్ట్ తోపాటు కాడిలాక్ వన్ - ఫస్ట్ కార్ అని కూడా అంటారు. అమెరికా అధ్యక్షుడి భద్రతలో ఇది సాటిలేనిదట..

ప్రపంచంలోనే హైఎండ్ టెక్నాలజీ భద్రత అమెరికా అధ్యక్షుడు ప్రయాణించే ఈ బీస్ట్ కారులో ఉంటుంది. ఈ కారు డోర్స్ మందమే 8 అంగుళాలు ఉంటుందంటే నమ్మండి.. శక్తివంతమైన బాంబు పేలుళ్లను సైతం ఈ డోర్స్ తట్టుకుంటాయట.. శత్రుదుర్భేధ్యమైన బుల్లెట్ ఫ్రూఫ్ టెక్నాలజీ గ్లాస్ తో ఈ కారును తయారు చేశారు.

ఈ కారును నడిపే డ్రైవర్ ను అమెరికా కేంద్ర నిఘా సంస్థ సీఐఏ ఎంపిక చేస్తుంది. సీక్రెట్ ఏజెంట్ మాత్రమే ఈ కారు డ్రైవర్ గా వ్యవహరిస్తాడు. మిగిలిన వారికి ఈ కారును కనీసం ముట్టుకోవడానికి కూడా అవకాశం ఇవ్వరు. రసాయన ఆయుధాలు కూడా ఈ బీస్ట్ తట్టుకోగలదు. బాంబులు పేలినా లోపలున్న ప్రెసిడెంట్ ట్రంప్ కు ఏమీ కాదు..

ఈ కారును అమెరికాలోని జనరల్ మోటార్స్ తయారు చేస్తుంది. ఇలాంటి మొత్తం 12 కార్లు ట్రంప్ కాన్వాయ్ లో ఉంటాయి. అమెరికా అధ్యక్షుడు ఎక్కడికి వెళ్లినా ఆయన వెంట బీస్ట్ కార్లు వెళతాయి. దీనికి ఖరీదు ఎంతనుకుంటున్నారు. అక్షరాల వంద కోట్ల రూపాయలు.8 టన్నుల బరువు ఉంటుంది. ఇంధన ట్యాంకు పేలకుండా భద్రత ఉంది. కారు కింద బాంబు పేలినా ఏమీ కాదు. కనీసం కుదుపు కూడా ఉండదు.

ఇక ఈ కారునుంచే ఎదుటివారిపై దాడి చేసేందుకు డ్రైవర్ సీటు పక్కనే డోర్ వద్ద అత్యాధునిక ఆయుధాలుంటాయి. బీస్ట్ కారు ముందు గ్రెనేడ్స్ కూడా ఉంటాయి. ఇలా అత్యంత భద్రత కలిగిన కారులో ట్రంప్ ప్రయాణిస్తారన్నమాట.. ఏకంగా 100 కోట్ల రూపాయల కారంటే మాటలా?