ముప్పనపల్లిలో మృత్యుఘోష..! అంతుచిక్కని వ్యాధితో 20 రోజుల్లో ఆరుగురు మృతి!

ఉమ్మడి వరంగల్ జిల్లా ఏటూరునాగారం ఏజెన్సీలోని ముప్పనపల్లి గ్రామంలో మృత్యు ఘంటికలు మోగుతున్నాయి. ఏం జరుగుతుందో తెలియక జనాలు బెంబేలెత్తుతున్నారు. ఓ వింత వ్యాధి జనాలను భయపెడుతున్నది. కేవలం గత 20 రోజుల్లోనే అంతుచిక్కని వ్యాధి సోకి ఆరుగురు ప్రాణాలు కోల్పోయారు. దీంతో జనాల్లో ఆందోళన పెరిగింది. ఏజెన్సీ ప్రాంతమైన ముప్పనపల్లిని ఈ వింతవ్యాధి వణికిస్తున్నది. అయితే తమ గ్రామానికి ఏదైనా దుష్టశక్తి ఆవహించి ఉంటుందని అక్కడి ప్రజలు భావిస్తున్నారు.


గత 20 రోజుల్లో ఈ గ్రామానికి చెందిన ఎర్రయ్య, లక్ష్మీనారాయణ, కుమారి, దుర్గమ్మ, రాధిక, రమేష్‌ అనే వ్యక్తులు చనిపోయారు. వీళ్లకు మొదట కడుపునొప్పి వచ్చింది. ఆ తర్వాత కొంతసేపటికే రక్తం కక్కుకొని చచ్చిపోయారు. అందరూ ఓకే రీతిన చనిపోవడంతో ప్రజల్లో భయం నెలకొన్నది. అయితే వైద్యశాఖ కూడా వెంటనే ఆప్రమత్తమైంది. గ్రామంలో క్యాంప్ నిర్వహించారు. చనిపోయిన వారికి.. గ్రామస్థులకు మలేరియా, కరోనా, టైఫాయిడ్​, డెంగ్యూ పరీక్షలు నిర్వహించారు. కానీ ఎలాంటి ఫలితం రాలేదు. ఆ ఆరుగులు ఎలా చనిపోయారో వైద్యులకు కూడా అంతుపట్టడం లేదు.

అయితే గ్రామస్థులు మాత్రం గ్రామాన్ని ఏదన్నా దుష్టశక్తి పట్టిపీడిస్తుందని భావిస్తున్నారు. దీంతో గ్రామంలో యజ్ఞాలు చేయాలని వేదపండితులను సంప్రదించారు. ఆ దిశగా ఏర్పాట్లు కూడా సాగుతున్నాయి. మరోవైపు వైద్య ఆరోగ్యశాఖ అధికారులు ఈ గ్రామంపై దృష్టి సారించారు. అంతుచిక్కని వ్యాధి ఏమిటో తెలుసుకొనేందుకు పరీక్షలు చేస్తున్నారు.