కరోనా తో అల్లాడిపోతోన్న యూపీ ...వెలుగులోతెచ్చిన ఫారెన్ మీడియా

దేశంలో కరోనా సెకండ్ వేవ్ విజృంభణ కొనసాగుతుంది. రోజుకి నాలుగు లక్షల మందికి పైగా కరోనా మహమ్మారి భారిన పడుతున్నారు. అలాగే మూడువేలమందికి పైగా మృత్యువాత పడుతున్నారు. దాదాపుగా దేశంలోని అన్ని రాష్ట్రాల్లో ఇదే పరిస్థితి కనిపిస్తుంది. ఈ క్రమంలోనే అనేక చోట్ల ఉన్న దారుణ పరిస్థితులపై అంతర్జాతీయ మీడియా కూడా ఫోకస్ చేసింది. ఇందులో భాగంగానే ఓ ఫారెన్ మీడియా సంస్థ యూపీలోని ఆసుపత్రుల్లో ఉన్న దుస్థితిపై కొన్ని నిజాలని బయటపెట్టింది. ఆసుపత్రికి వచ్చిన కరోనా బాధితుల్ని పట్టించుకునే నాథుడే లేడని, బాధితులంతా తమకు ఎప్పుడు బెడ్ ఇస్తారా , ఎప్పుడు చికిత్స చేస్తారా అని ఆసుపత్రి ఆవరణలోనే వేచి చూస్తున్నారంటూ తెలిపింది.

ఇదే సమయంలో కొందరు కరోనా బాధితులతో మాట్లాడి వారి కన్నీటి గాధను తెలిపే ప్రయత్నం చేసింది. ఊపిరందని స్థితిలో ఉన్న కొడుకును చూస్తూ ఆక్రోశిస్తున్న ఓ తండ్రి ఆక్రందనను, అమ్మ ప్రాణం కోసం అల్లాడిపోతున్న నలుగురు కొడుకుల ఆవేదనను, ఆక్సిజన్ కోసం ప్రాథేయపడుతూ 4 రోజులుగా నేలపైనే పడిగాపులు కాస్తున్న ఓ మహిళ బాధను కళ్లకి కట్టినట్టు చూపించింది. అలాగే ప్రతిరోజూ ఎంతో మంది మృత్యువుతో పోరాడి అలసిపోయి ప్రాణాలు కోల్పోతున్న ఘటనలనూ వెలుగులోకి తీసుకువచ్చింది. అప్పుడే అక్కడే ఉన్న ఓ అమ్మ కరోనా కాటుకి బలైపోయింది. ఆమె పిల్లలు ఆమెని బ్రతికించుకోవడానికి ఎంతగా ప్రయత్నించినా కూడా అసలు లాభం లేకుండా పోయింది. డాక్టర్ వచ్చి ఆమె మృతి చెందింది అని చెప్పారు. దీనితో ఈ పరిస్థితికి కారణం ప్రభుత్వం కాదా , ముప్పును ఊహించకుండా, దానిని ఎదుర్కొనేందుకు కనీస ఏర్పాట్లు కూడా చేయకుండా ఉండడం వల్లనే ఇప్పుడు ఇలాంటి దుస్థితి ఏర్పడుతోందని ఆ ఫారెన్ మీడియా సంస్థ ఆరోపించింది. ఆసుపత్రుల్లో ఉన్న ఎక్కువమంది బాధితులు తమకు ఆక్సిజన్ అందడం లేదని ఆరోపించగా.. దీనిపై సదరు మీడియా ప్రతినిధి ఈ సమస్యపై ఆసుపత్రి ఇంచార్జిని అడిగితే , ఆస్పత్రిలో ఆక్సిజన్ కొరత ఏమీ లేదని, స్టాఫ్ తక్కువగా ఉండడం వల్లనే సమస్యలు తలుత్తుతున్నాయని ఆ ఇంచార్జి చెప్పుకొచ్చారు.