తెలివంటే వీళ్లదే.. పోయిన చోటే వెతుకున్నారుగా!

కరోనా దెబ్బకు హోటళ్లు, ఆతిథ్యరంగం, చిరువ్యాపారాలు కుదేలయైపోయాయి. ఎం చేయాలో తెలియక కొందరు వ్యాపారాలు వదిలేసి పల్లె బాటపట్టారు. మరికొందరు మాత్రం పోయినచోటే కొత్తదారులు వెతుకుంటున్నారు. అందులో భాగంగానే పెద్దపెద్ద హోటళ్లను, ఫంక్షన్​హాళ్లను కరోనా క్వారంటైన్​ సెంటర్లుగా మార్చారు. కరోనాతో కేరళకు పర్యాటకుల తాకిడి తగ్గిపోయింది. రిసార్టులకు వచ్చేవాళ్లే లేరు. గిరాకీ లేక రిసార్టు యజమానులంతా తీవ్ర నష్టాలు చవిచూస్తున్నారు. కరోనా ఎఫెక్ట్​తో గిరాకీ లేక కేరళలోని రిసార్టులు, హోటళ్లు దాదాపు 25 వేల కోట్ల నష్టపోయినట్టు నిపుణులు అంచనా వేస్తున్నారు.
కానీ ఓ రిసార్ట్​ యజమాని కాస్త భిన్నంగా ఆలోచించాడు. తన రిసార్ట్​లోని ఓ స్విమ్మింగ్​ ఫూల్​ను చేపల చెరువుగా మార్చాడు. ఈ చేపలు విక్రయించి ప్రస్తుతం రూ. లక్షలు సంపాదిస్తున్నాడు.

కేరళకు చెందిన అవేదా రిసార్ట్​ కూడా కరోనాతో తీవ్ర నష్టాలను మూటగట్టుకున్నది. నిర్వహణ భారంగా మారడంతోపాటు సిబ్బందికి కూడా జీతాలు ఇవ్వలేని పరిస్థితి నెలకొన్నది. దీంతో ఎలాగైన రిసార్ట్​లో పనిచేసే సిబ్బందికి జీతాలు ఇవ్వాలని ఆలోచించిన యాజమాన్యం అక్కడి స్విమ్మింగ్ప పూల్​లో చేపలు పెంచాలని నిర్ణయించింది. ‘లాక్​డౌన్​తో మా కంపెనీ నష్టపోయింది. సిబ్బందికి కూడా వేతనాలు ఇవ్వలేక పోతున్నాం. ఈ సమయంలో ఉన్న స్థలాన్ని, వనరులను ఉపయోగించుకొని సిబ్బందికి వేతనాలు ఇవ్వాలని నిర్ణయించుకున్నాం. అందుకే చేపల పెంపకం చేపట్టాం’ అని చెప్పారు

అవేదా రిసార్ట్స్​ అండ్​ స్పా జీఎం జ్యోతీశ్​ సురేంద్రన్​. 'తమ వద్ద ఉన్న స్విమ్మింగ్​ ఫూల్​లో రూ. 6 లక్షల పెట్టుబడి పెట్టి 16 వేల కొర్రమీను చేపలను పెంచుతున్నాం. రిసార్ట్​లో పనిచేస్తున్న సిబ్బంది ఇక్కడ పనిచేస్తున్నారు. చేపలు పెద్దయ్యాక దాదాపు 15 లక్షల ఆదాయం వస్తుందని భావిస్తున్నాం. దీని ద్వారా ఇక్కడ పనిచేసే సిబ్బందికి వేతనాలు చెల్లిస్తాం’ అని చెప్పింది అక్కడి యాజమాన్యం. ఏది ఏమైనా అవేదా యాజమాన్యం తెలివిని పలువురు ప్రశంసిస్తున్నారు.