భారత్ ​లో కరోనా తగ్గుతోందా.. పెరుగుతోందా! నిజానిజాలేంటి?

ప్రపంచ దేశాలతో పాటు మనదేశాన్ని కరోనా మహమ్మారి అతలాకుతలం చేసింది. లాక్​డౌన్​ సమయంలో కొంచెం తక్కువగా ఉన్న కేసులు.. లాక్​డౌన్​ ఎత్తేశాక కట్టలు తెంచుకున్నాయి. కేసుల పెరుగుదలకే అంతే లేకుండా పోయింది. రోజుకు 60 వేలు, 70 వేలు, 90 వేలు లక్షదాక కేసులు పెరిగాయి. ఈ క్రమంలో పెరుగుట విరుగట కొరకే అని కొందరు విశ్లేషకులు భావించారు. భారత్​ లో కేసులు భారీగా పెరిగి ఆ తర్వాత తగ్గు ముఖం పడతాయని చెప్పారు. కానీ ఇక్కడ కేసుల సంఖ్య పెరగడమే తప్ప తగ్గడం కనిపించలేదు. ఈ నేపథ్యంలో కేసులు పెరుగుతున్నప్పటికీ రికవరీ కూడా అదే స్థాయిలో ఉండటంతో జనంలో కొంతమేర భయం పోయింది. తమ కండ్ల ముందే చాలా మంది కి కరోనా వచ్చి తగ్గక పోతుండటంతో జనం ఈ మహమ్మారి ని లైట్​ తీసుకొనే పరిస్థితి కి వచ్చారు. ఓ దశలో కరోనా ఏముంది? అందరికీ వస్తుంది? పోతుంది కాస్త జాగ్రత్తగా ఉంటే సరిపోతుంది అనే ఆలోచనలో పడ్డారు. వృద్ధులు, చిన్నపిల్లలు జాగ్రత్తగా ఉంటూ.. మిగతా వాళ్లు యథావిధిగా తమ పనులు చేసుకుంటున్నారు. జులై-ఆగ‌స్టు నెల‌ల్లోనే క‌రోనా తీవ్ర‌త ప‌తాక స్థాయికి చేరుతుంద‌ని.. ఆ త‌ర్వాత త‌గ్గుముఖం ప‌డుతుంద‌ని ఒక ద‌శ‌లో అంచ‌నా వేశారు. కానీ అలా జరగలేదు. కేసుల సంఖ్య పెరిగింది తప్ప తగలేదు.

ఈ వారం లెక్క మారింది..

అయితే గతవారం రోజులుగా మనం కరోనా కేసులను అంచనా వేస్తే గతంకంటే కొంత తగ్గినట్టుగా అనిపిస్తున్నది. ఈ వారంలో కేసులు రోజుకు 75 వేలు మాత్రమే నమోదవుతున్నాయి. రోజుకు 90 వేల నుంచి 75 వేలకు పడిపోయాయని.. ఇదే పరిస్థితి కొనసాగితే దేశంలో కేసుల సంఖ్య తగ్గడం మొదలైందని భావించవచ్చని కొందరు నిపుణులు అంచనా వేస్తున్నారు. ఓ సారి ఇలా తగ్గడం స్టార్ట్​ అయ్యిందంటే ఇక కేసుల సంఖ్య క్రమేపీ తగ్గతుంది. ఈ విషయాన్ని ప్రపంచవ్యాప్తంగా గణాంకాలు చెబుతున్నాయి. బ్రెజిల్​, ఇటలీ, అమెరికా లాంటి ఎక్కువ కేసులున్న దేశాల్లో ఇదే పరిస్థితి కనిపించింది. వ్యాక్సిన్​ వచ్చిందంటే కరోనా ముప్పు తగ్గినట్టే.. అయితే ఆ లోపే కేసుల సంఖ్య కూడా తగ్గితే మనకు కొంతమేర ఉపశమనం లభించినట్టే.