ఏపీలో ర‌హ‌దారులకు కేంద్రం నిధులు.. ఎక్క‌డెక్క‌డ అంటే..?

ఆంధ్రప్రదేశ్ లో ర‌హ‌దారుల నిర్మాణానికి కేంద్రం ప‌చ్చ‌జెండా ఊంది. ఏపీకి సంబంధించిన ఇన్‌ఫ్రాస్ట్రక్చర్ ప్రాజెక్టులకు (హైవే ప్రాజెక్టులు) ఆమోదం తెలుపుతూ కేంద్ర రోడ్డు రవాణ రహదారుల శాఖ ఉత్త‌ర్వులు జారీచేసింది.

ఎన్‌హెచ్ 130 సీడీకి చెందిన కొర్లమ్-కంటకపల్లి సెక్షన్ 6 లైన్ డెవలప్‌మెంట్ పనులకు మోక్షం ల‌భించింది. ఈ ప్రాజెక్ట్ విలువ దాదాపు రూ.772.7 కోట్లు ఉంటుంది. ఆంధ్రప్రదేశ్‌కు సంబంధించిన రాయ్‌పూర్- విశాఖపట్నం ఎకనమిక్స్ కారిడార్‌ కింద ఈ ప్రాజెక్ట్ పనులు జ‌ర‌గ‌నున్నాయి.

అదేవిధంగా.. ఎన్‌హెచ్ 130 సీడీకి చెందిన కంటకపల్లి- సబ్బవరం 6 లైన్ నిర్మాణానికి కూడా కేంద్ర ప్రభుత్వం గ్రీన్ సిగ్నల్ ఇచ్చింది. ఈ ప్రాజెక్ట్ విలువ దాదాపు రూ.824 కోట్లుగా ఉంటుంది. వీటితోపాటు అనంతపురంలో ఎన్‌హెచ్ 42కు చెందిన 4 లైన్ల అర్బన్ రోడ్డు విస్త‌ర‌ణ పనులకు కూడా కేంద్రం అనుమ‌తులు మంజూరు చేసింది. ఈ ప‌నుల‌కు రూ.311 కోట్లు కేటాయిస్తూ నిర్ణ‌యం తీసుకుంది.

ఏపీతోపాటు ఉత్తరప్రదేశ్‌లోని ర‌హ‌దారుల‌కు కూడా కేంద్రం ఆమోదం తెలిపింది. రాయ్‌బరేలి- జగదీశ్‌పూర్ 2/4 లైన్‌కు గ్రీన్ సిగ్నల్ ఇచ్చింది. ఈ ప్రాజెక్ట్ విలువ రూ.720 కోట్లు. వీటితోపాటు మరో రెండు ప్రాజెక్టులకు కూడా కేంద్ర రోడ్డు రవాణ రహదారుల శాఖ మంత్రి గడ్కరీ ఓకే చెప్పారు.