ఫైనల్లో స్టోక్స్ ఆ నాలుగు పరుగులు వద్దన్నాడట!

ప్రపంచకప్ ఫైనల్ చివరి ఓవర్లో ఇంగ్లాండ్ బ్యాట్స్‌ మన్ బెన్ స్టోక్స్ పరుగు తీస్తూ డైవ్ చేయడం.. అతడి బ్యాటుకు తాకి ఓవర్ త్రోల రూపంలో నాలుగు పరుగులు అదనంగా రావడం ఇంగ్లాండ్‌ కు బాగా కలిసొచ్చిన సంగతి తెలిసిందే. 3 బంతుల్లో ఇంగ్లాండ్ 9 పరుగులు చేయాల్సి ఉండగా.. స్టోక్స్ రెండో పరుగు తీస్తుండగా గప్తిల్ వేసిన త్రోకు ఇలా జరిగింది. స్టోక్స్ తీసిన రెండు పరుగులకు - ఈ అదనపు 4 పరుగులు తోడై 6 పరుగులు వచ్చాయి. దీంతో 2 బంతుల్లో 3గా సమీకరణం తేలికైపోయింది. చివరికి ఈ మ్యాచ్ టై అయింది. ఇంగ్లాండ్‌ కు అన్యాయంగా 4 పరుగులు వచ్చాయని, లేదంటే న్యూజిలాండే ప్రపంచకప్ గెలిచేదన్న అభిప్రాయం అందరిలోనూ వ్యక్తమైంది.

ఐతే స్టోక్స్ ఉద్దేశపూర్వకంగా బంతికి బ్యాట్ తాకించకపోయినప్పటికీ.. ఆ నాలుగు పరుగులు ఇంగ్లాండ్ స్కోరులో కలపొద్దని అంపైర్లను కోరాడట. ఈ విషయాన్ని ఇంగ్లాండ్ టెస్టు బౌలర్ అండర్సన్ ఒక కాలమ్‌ లో వెల్లడించాడు. మాజీ కెప్టెన్ మైకేల్ వాన్ ద్వారా తనకీ విషయం తెలిసిందన్నాడు. అయితే అంపైర్లు మాత్రం.. నిబంధనల ప్రకారం బ్యాట్స్‌మన్ ఉద్దేశపూర్వకంగా బంతికి అడ్డం పడనప్పుడు ఆ పరుగులు జట్టు స్కోరులో కలుస్తాయని చెప్పి అతడి విన్నపాన్ని తిరస్కరించారట. ఇది నిజమైతే స్టోక్స్ జెంటిల్ మన్ అన్నట్లే.