విశాఖ గజగజ.. వణికిస్తున్న వింతరోగం.. ఐదుగురు మృతి

ఇప్పటికే కరోనా మహమ్మారితో ఓ పక్క జనాలు ఉక్కిరిబిక్కిరవుతుంటే.. ఏపీలోని విశాఖ ఏజెన్సీ ప్రాంతంలో మరో వింతరోగం దాపురించింది. ఈ అంతుచిక్కని రోగానికి ఐదుగురు బలయ్యారు. వెంబడే అప్రమత్తమైన వైద్యశాఖ వివరాలు సేకరించింది. విశాఖ ఏజెన్సీ అనంతగిరి మండలంలోని రొంపల్లి పంచాయితీ కరకవలస, చినరాభ గ్రామాల్లో గత మూడువారాల్లో ఐదుగురు గిరిజనులు ఈ మాయదారి రోగానికి బలయ్యారు. కొన్నిరోజుల వ్యవధిలోనే జ్వరం , కడుపునొప్పి, కాళ్లు చేతులువిపరీతంగా వాపులు వచ్చి చనిపోయారని స్థానికులు చెబుతున్నారు.

ఏజెన్సీ ప్రాంతంలో ఐదుగురు చనిపోవడంతో వెంబడే రంగంలోకి దిగిన ఎమ్మెల్యే శెట్టి ఫాల్గుణి అధికారులతో మాట్లాడారు. విశాఖ డీఎంహెచ్​వో వైద్యసిబ్బందితో కలిసి వ్యాధి సోకిన గ్రామాలను పరిశీలించి పరిశీలించారు. అనంతరం ఆయా గ్రామాల్లో అనారోగ్యం బారిన పడిన మొత్తం 18 మంది కరోనా పరీక్షలు నిర్వహించగా వారికి నెగిటివ్​గా నిర్ధారణ అయ్యింది. కాగా గిరిజనులు చాలాకాలం పాటు నిలువ ఉంచి మాంసాన్ని తినడం వల్లే అనారోగ్యం బారిన పడిఉంటారని వైద్య​ అధికారులు ప్రాథమికంగా తేల్చారు. దీనిపై పూర్తిస్థాయి విచారణ జరుగవలసి ఉంది. కాగా మరోవైపు ఏజెన్సీ ప్రాంతాల ప్రజలకు వైద్యసదుపాయం అందుబాటులో లేదు. వారికి ఏమన్నా అనారోగ్యం కలిగితే భీమవరం హెల్త్​సెంటర్​కు వెళ్లాల్సి ఉన్నది. అందుకోసం 20 కిలోమీటర్లు ప్రయాణించాల్సి వస్తుంది. అందువల్ల ప్రభుత్వం స్పందించి తమ గ్రామాల్లో హెల్త్​క్యాంపులు ఏర్పాటు చేయాలని గ్రామస్థులు కోరుతున్నారు.