బెజవాడలో మరో ఆస్పత్రి అరాచకం.. వేటేసిన కలెక్టర్​

కరోనా విపత్తును ఆసరాగా చేసుకున్న కొన్ని కార్పొరేట్​ ఆస్పత్రులు ప్రజలను జలగల్లా పీల్చుకుతింటున్నాయి. మందులేని కరోనా వ్యాధికి లక్షల్లో ఫీజులు వసూలు చేస్తున్నాయి. పీపీఈ కిట్లకు కూడా వేలలో ఫీజులు వసూలు చేస్తున్నాయి. కరోనా లాక్​డౌన్​ టైంలో గిరాకీ లేక ఇబ్బందులు ఎదుర్కొన్న కార్పొరేట్​ ఆస్పత్రులు కరోనా వైద్యానికి సర్కార్​ అనుమతి ఇవ్వడంతో రెచ్చిపోయాయి. ఒక్కో పేషెంట్​ వద్ద లక్షల్లో ఫీజులు వస్తున్నాయి. ఆస్తులమ్మి మరి ఫీజులు చెల్లిస్తున్నారు సాధారణ ప్రజలు. నిబంధనలకు విరుద్ధంగా భారీగా ఫీజులు వసూలు చేస్తున్న ఓ ఆస్పత్రిపై కృష్ణా జిల్లా కలెక్టర్​ చర్యలు తీసుకున్నారు. ఆ ఆస్పత్రికి కోవిడ్​ వైద్యానికి ఇచ్చిన అనుమతిని రద్దుచేశారు.

విజయవాడలో వైద్యవ్యాపారం జోరుగా సాగుతున్నది. లిబర్జీ ఆస్పత్రి యాజమాన్యం ఇష్టారాజ్యంగా ఫీజులు వసూలు చేయడంతోపాటు రోగులను పట్టించుకోవడం లేదు. దీంతో ఆ ఆస్పత్రి పై ఫిర్యాదులు వెల్లువెత్తాయి. స్పందించిన కలెక్టర్​ విచారణ జరిపి చర్యలు తీసుకున్నారు.

రాజమండ్రి చెందిన ఓ వ్యక్తికి ఇటీవల కరోనా సోకింది. దీంతో అతడిని కుటుంబసభ్యులు విజయవాడలోని లిబర్టీ హాస్పిటల్‌లో చేర్పించారు. టెస్టులు, మందుల పేరుచెప్పి హాస్పిటల్​ యాజమాన్యం లక్షల రూపాయలు గుంజింది. రోజువారి పీపీఈ కిట్లకే వేలల్లో ఫీజులు వసూలు చేశారు. సాధారణంగా బయట రూ. 300 లకు దొరికే పీపీఈ కిట్లకు రోజుకు రూ.10 వేలు బిల్లు వేశారు. టెస్టులు, వైద్యం, నర్సింగ్​ఖర్చులు, శానిటేషన్​ ఖర్చు అంటూ లక్షల్లో ఫీజులు వసూలు చేసింది యాజమాన్యం. చివరకు ఆ వ్యక్తి మరణించాడంటూ కుటుంబసభ్యులకు సమాచారం ఇచ్చారు. దీంతో సదరు వ్యక్తి భార్య కృష్ణా జిల్లా కలెక్టర్​కు ఫిర్యాదు చేశారు. ఆస్పత్రి నిర్వాకంపై కలెక్టర్​ ఓ కమిటీని వేసి విచారించారు. లిబర్టీ హాస్పిటల్​ అధిక ఫీజు వసూలు చేసిందని నిర్ధారణ కావడంతో ఆ ఆస్పతికి ఇచ్చిన అనుమతులు రద్దుచేశారు. అంతేకాక అక్కడ చికిత్స పొందుతున్న కరోనా రోగులను వేరే ఆస్పత్రికి తరలించాలని ఆదేశాలు జారీచేశారు.