అమిత్ షా బిజీ.. తెలుగు రాష్ట్రాలకు ఇంతే!

మరోసారి అమిత్ షా పర్యటన రద్దు అయ్యింది. ఇది వరకూ పలు సార్లు అమిత్ షా తెలుగు రాష్ట్రాల వైపు వస్తున్నట్టుగా ప్రకటనలు రావడం - చివర్లో ఆ పర్యటనలు రద్దు కావడం తెలిసిన సంగతే. ఈ క్రమంలో మరోసారి అదే జరిగింది. తెలంగాణ విమోచన దినోత్సవాన్ని బీజేపీ నిర్వహిస్తున్న నేపథ్యంలో ఆ కార్యక్రమానికి అమిత్ షా వస్తారని కమలనాథులు గట్టిగా ప్రచారం చేశారు. చాలా రోజుల నుంచినే ఈ మేరకు ప్రకటనలు చేస్తూ వచ్చారు.

ఇటీవలే లోక్ సభ సార్వత్రిక ఎన్నికల్లో తెలంగాణలో బీజేపీ అనూహ్య విజయాలు సాధించిన నేపథ్యంలో ఇక్కడ పార్టీని బలోపేతం చేసుకోవడానికి అమిత్ షా ఇక్కడకు వస్తున్నారనే అంచనాలు కూడా ఏర్పడ్డాయి. అయితే అమిత్ షా జాతీయ రాజకీయాలతో బిజీగా ఉన్నారని - అందుకే ఆయన తాము నిర్వహిస్తున్న తెలంగాణ విమోచన దినోత్సవానికి రావడం లేదని బీజేపీ తెలంగాణ నేతలు ప్రకటించారు.

అమిత్ షా వస్తారంటూ మొదట్టో ప్రచారం చేసుకుని - ఇప్పుడు రావడం లేదని వారు ప్రకటిస్తూ ఉన్నారు. ఆయన రాకపోవడంతో ఈ కార్యక్రమంలో పాల్గొనడానికి కేంద్రమంత్రులు ఎవరైనా వస్తారా? అనే అంశంపై కూడా బీజేపీ వాళ్లు సూటిగా చెప్పలేదు. ఆ అంశంపై ఇంకా కసరత్తు సాగుతోందని ప్రకటించారు. మొత్తానికి అమిత్ షా తెలుగు రాష్ట్రాల వైపు రావడం అంత తేలికగా జరిగేలా లేనట్టుంది!