ప్రకాశ్ రాజ్‌ కు ఆయన సపోర్ట్ దొరికింది

ఎన్నికల బరిలో అడుగుపెట్టిన నటుడు ప్రకాశ్ రాజ్‌ కు నడిగర్ సంఘం అధ్యక్షుడు - హీరో విశాల్ మద్దతు లభించింది. కర్నాటకలోని బెంగుళూరు సెంట్రల్ లోక్ సభ నియోజకవర్గం నుంచి స్వతంత్ర అభ్యర్థిగా బరిలో దిగిన ప్రకాశ్ రాజ్ ఇప్పటికే ముమ్మరంగా ప్రచారం చేస్తున్నారు. అయితే, ఆయన వెంట సినీ రంగానికి చెందినవారెవరూ పెద్దగా ఇంతవరకు కనిపించలేదు. అయితే.. పోలింగ్ తేదీ సమీపిస్తున్న వేళ ప్రకాశ్ రాజ్‌ కు అనూహ్యంగా విశాల్ నుంచి మద్దతు లభించింది.

విశాల్ తాజాగా ఒక వీడియో రిలీజ్ చేసి అందులో ప్రకాశ్ రాజ్‌ కు ప్రజలు ఓటేయాలని పిలుపునిచ్చారు. ఆ వీడియాలో విశాల్... ‘‘ ఇప్పుడున్న రోజుల్లో ఇండిపెండెంట్‌ గా పోటీ చేసి గెలవడం అనేది అంత ఈజీ కాదు. ప్రజలకు సేవ చేయాలన్న తపన - మనోధైర్యం ఉంటే తప్ప ఇలాంటి సాహసం చేయలేరు. సమాజానికి సంబంధించిన ఎన్నో కీలకాంశాలపై నిర్మొహమాటంగా మాట్లాడే ప్రకాశ్ రాజ్ ఇలాంటి పోటీకి అర్హులే. కాబట్టి ఈల గుర్తుపై ఓటేసి ప్రకాశ్ రాజ్‌ ను గెలిపించాలి’’ అని విశాల్ బెంగుళూరు సెంట్రల్ ప్రజలకు పిలుపునిచ్చారు.

కాగా ప్రకాశ్ రాజ్ పోటీ చేస్తున్న బెంగళూరు సెంట్రల్ నియోజకవర్గానికి ఏఫ్రిల్ 18న పోలింగ్ జరగబోతోంది. విస్తృతంగా ప్రచారం చేస్తున్న ప్రకాశ్ రాజ్ తాను గెలిస్తే ఏమేం చేస్తానో చెబుతూ ఒక మేనిఫెస్టో కూడా విడుదల చేశారు. అయితే.. రాజకీయ పార్టీల మధ్య ప్రకాశ్ రాజ్ ఎంతవరకు విజయం సాధిస్తారన్నది చూడాలి.