బీజేపీ గూటికి ‘ఆ పవర్ స్టార్’

పవర్ స్టార్ పేరు విన్న వెంటనే పవన్ కల్యాణ్ గుర్తుకు రావాల్సిందే. అయితే.. ఇప్పుడు మేం చెబుతోన్నది తెలుగు పవర్ స్టార్ కాదు.. తమిళ పవర్ స్టార్ గురించి. టాలీవుడ్ లో మాదిరే కోలీవుడ్ లో కూడా ఒక పవర్ స్టార్ ఉన్నారు. అతని పేరు శ్రీనివాసన్. లతికా చిత్రంతో కోలీవుడ్ లో తనదైన ముద్ర వేసిన ఈ పవర్ స్టార్.. తర్వాత ‘కన్నా లడ్డు తిన్న ఆశైయా’ తదితర కామెడీ చిత్రాల్లో నటించాడు.

వివాదాస్పద వ్యవహారాలకు కేరాఫ్ అడ్రస్ గా నిలిచే ఈ తమిళ పవర్ స్టార్ తనకొచ్చిన ఛాన్స్ ల్ని మిస్ చేసుకున్నట్లుగా చెబుతారు. తాజాగా తమిళనాడులో నడుస్తున్న రాజకీయ సందడి పుణ్యమా అని.. రాజకీయ పార్టీలతో మమేకమవుతున్న తరుణంలో శ్రీనివాసన్ బీజేపీ తీర్థం పుచ్చుకున్నారు. కేంద్ర సహాయ మంత్రి రాధాకృష్ణన్ సమక్షంలో పార్టీ చేరిన ఆయన.. తాజాగా జరుగుతున్న తమిళనాడు ఎన్నికల్లో బీజేపీ తరఫున ప్రచారం చేయనున్నారు. తన ప్రచారంతో తెలుగు పవర్ స్టార్ టీడీపీ.. బీజేపీకి ‘పవర్’ ఇవ్వటం తెలిసిందే. మరి.. ఈ తమిళ పవర్ స్టార్ కారణంగా తమిళనాడులో బీజేపీకి ఎంత ‘పవర్’ వచ్చేలా చేస్తాడో చూడాలి మరి.