ప్రకాశంలో గ్రానైట్ మాఫియా ... ప్రభుత్వానికి రూ. 300 కోట్ల భారీ నష్టం !

Mon Jan 20 2020 14:18:10 GMT+0530 (IST)

Granite Mafia in Prakasam District

ప్రకాశంలో గ్రానైట్ మాఫియా గుండెల్లో ప్రకంపనలు మొదలయ్యాయి. టీడీపీ అధికారంలో ఉన్నప్పుడు విచ్చలవిడిగా అక్రమాలకు పాల్పడ్డ గ్రానైట్ మాఫియా డొంక కొంచెం కదులుతోంది. టీడీపీ ప్రభుత్వ హయాంలో ఆ పార్టీఎమ్మెల్యే యరపతినేని శ్రీనివాసరావు కనుసన్నల్లో గ్రానైట్ అక్రమ రవాణా యథేచ్ఛగా కొనసాగింది. ఆయన తన అనుచరులు పావులూరి చిన కోటయ్య చంద్రమౌళి ద్వారా ప్రకాశం జిల్లా నుంచి వేలాది లారీల గ్రానైట్ను బిల్లులు లేకుండా పొరుగు రాష్ట్రాలకు తరలించినట్లు పోలీసుల విచారణలో తేలింది. అద్దంకి సేల్స్ ట్యాక్స్ అసిస్టెంట్ కమిషనర్ వి.పి.శ్రీనివాస్ ఇచ్చిన ఫిర్యాదుపై స్పందించిన ప్రకాశం జిల్లా ఎస్పీ సిద్ధార్థ్ కౌశల్ ప్రత్యేక టాస్క్ఫోర్స్ బృందాన్ని ఏర్పాటు చేసి లోతుగా దర్యాప్తు చేయడంతో ఈ గ్రానెట్ దందా మొత్తం బయట పడింది.



దీనిపై పూర్తి వివరాలు చూస్తే ... ప్రకాశం జిల్లాలోని చీమకుర్తి బల్లికురవ మార్టూరు సంతమాగులూరు వంటి ప్రాంతాల్లో కొందరు వ్యాపారులు రాజకీయ నాయకుల అండదండలతో నకిలీ కంపెనీలు సృష్టించి వాటి పేరిట ఆన్ లైన్ ద్వారా ఈ–వే బిల్లులు పొంది గ్రానైట్ లారీలను అక్రమంగా రాష్ట్రం దాటించారు. కొన్నిసార్లు అసలు బిల్లులు కూడా లేకుండా గ్రానైట్ లారీలను ఇతర రాష్ట్రాలకు తరలించి ప్రభుత్వ ఆదాయానికి బాగా గండి కొట్టారు. గత టీడీపీ సర్కారు హయాంలో ఈ బాగోతం నిరాటంకంగా సాగింది.

టీడీపీ అధికారం లో ఉన్న ఐదేళ్ల లో యరపతినేని శ్రీనివాసరావు అనుచరులు బిల్లులు లేకుండా ఇతర రాష్ట్రాలకు తరలించిన గ్రానైట్ విలువ రూ.1000 కోట్లకు పైగా ఉంటుందని పోలీసులు అంచనా వేస్తున్నారు. ఇక నకిలీ వే బిల్లులతో వెళ్లిన లారీల సంఖ్య వేలల్లోనే ఉంటుందని చెబుతున్నారు. ఈ గ్రానైట్ లారీలు సక్రమంగా పన్నులు చెల్లించి ఉంటే ప్రభుత్వ ఖజానాకు రూ.300 కోట్లకు పైగా ఆదాయం వచ్చేదని తేల్చారు. ప్రకాశం జిల్లా టాస్క్ఫోర్స్ పోలీసులు యరపతినేని అనుచరుడు చంద్రమౌళి ని అదుపులోకి తీసుకున్నారన్న విషయం తెలియగానే మరో అనుచరుడు చిన కోటయ్య అజ్ఞాతంలోకి వెళ్లిపోయాడు. గుంటూరు జిల్లా పిడుగురాళ్ల మండలం గుత్తి కొండకు చెందిన పావులూరి కోటేశ్వరరావు అలియాస్ చిన కోటయ్య 2014కు ముందు సొంత ఇల్లు కూడా లేక అద్దె ఇంటిలో నివాసం ఉండేవాడు. కానీ ఆ తరువాత ఈ గ్రానెట్ మాఫియా లో కీలక సూత్రధారిగా వ్యవహరిస్తూ ఐదేళ్లలోనే చిన కోటయ్య రూ.కోట్లకు పడగలెత్తాడు. ప్రస్తుతం ఇతని కోసం పోలీసులు వెతుకుతున్నారు. ఈ నేపథ్యంలో టీడీపీ అధికారంలో ఉన్న సమయంలో గ్రానైట్ మాఫియా కు సహకరించిన ప్రభుత్వ అధికారుల్లో కలవరం మొదలైనట్టు తెలుస్తుంది.