ICE నియామకాల ప్రచారంపై విమర్శలు.. అమెరికాలో కొత్త వివాదం!

అమెరికాలో ICE చేపట్టిన ఉద్యోగ నియామకాల ప్రచారం వివాదానికి దారితీసింది. ప్రచారంలో ఉపయోగించిన ‘The way it was, the way it can be again’ అనే నినాదంపై అభ్యంతరాలు వ్యక్తమవుతున్నాయి. అమెరికాను మళ్లీ పాత రోజుల్లోకి తీసుకెళ్లాలన్న ఈ సందేశం జాత్యహంకార భావనను సూచిస్తోందని విమర్శకులు ఆరోపిస్తున్నారు.

వలసదారులపై కఠినంగా వ్యవహరించే ICE నుంచి ఇలాంటి నినాదం రావడంపై పలువురు ప్రశ్నలు లేవనెత్తారు. గతంలో తెల్లజాతీయుల ఆధిపత్యం ఉన్న అమెరికాను తిరిగి తీసుకురావాలనే ఉద్దేశం ఇందులో కనిపిస్తోందని వారు అంటున్నారు.

రాజకీయ వ్యాఖ్యాత రిచర్డ్ హనానియా ఈ ప్రచారంపై స్పందిస్తూ.. ఇమ్మిగ్రేషన్ చట్టాలను అమలు చేసే వారు తెల్లజాతీయులే ఉండే దేశాన్ని కోరుకుంటున్నారా అని ప్రశ్నించారు. డెమొక్రటిక్ పార్టీ వ్యూహకర్త మరియా కార్డోనా ఈ ప్రచారాన్ని జాత్యహంకార, విద్వేషపూరిత సందేశంగా అభివర్ణించారు.

ఈ నియామకాల వెనుక ట్రంప్ ఇమ్మిగ్రేషన్ విధానాల్లో కీలకంగా వ్యవహరించిన స్టీఫెన్ మిల్లర్ ఉన్నారు. ICEలో చేరేవారికి 50 వేల డాలర్ల రిటెన్షన్ బోనస్‌తో పాటు సైనింగ్ బోనస్‌లు కూడా ఇస్తామని ఆయన ప్రకటించారు.

ఒకవైపు భారీ బోనస్‌లతో కొత్త ఉద్యోగులను ఆకర్షించే ప్రయత్నం జరుగుతుంటే, మరోవైపు ప్రచారంలోని నినాదం రాజకీయ విమర్శలకు కారణమైంది. దీనిపై ICE లేదా అమెరికా హోంల్యాండ్ సెక్యూరిటీ శాఖ ఇప్పటివరకు అధికారికంగా స్పందించలేదు.