Begin typing your search above and press return to search.

ఆస్ట్రేలియాలో చదువుతున్న వారికి కొత్త తలనొప్పి.. కుటుంబ సభ్యుల వీసాపై మారిన రూల్స్!

ఆస్ట్రేలియా 485 వీసా నిబంధనల్లో నవంబర్ 13 నుంచి కీలక మార్పులు అమల్లోకి వచ్చాయి. ఇకపై విద్యార్థులు చదువు తర్వాత వీసా కోసం దరఖాస్తు చేసేటప్పుడే అర్హులైన భార్య, పిల్లలను కూడా చేర్చుకోవాలి. వీసా వచ్చిన తర్వాత కుటుంబ సభ్యులను విడిగా తీసుకెళ్లే అవకాశం సాధారణంగా ఉండదు. అయితే కొన్ని ప్రత్యేక వర్గాలకు మినహాయింపులు కల్పించారు. నవంబర్ 13కి ముందు దరఖాస్తు చేసినవారికి పాత నిబంధనలే వర్తిస్తాయి.

By:  Tupaki Desk   |   17 Nov 2026 10:11 AM IST
ఆస్ట్రేలియాలో చదువుతున్న వారికి కొత్త తలనొప్పి.. కుటుంబ సభ్యుల వీసాపై మారిన రూల్స్!
X

ఆస్ట్రేలియాలో చదువు పూర్తిచేసి అక్కడే ఉద్యోగం చేయాలనుకునే విద్యార్థులు ఇకపై తమ కుటుంబ సభ్యుల విషయంలో ముందుగానే నిర్ణయం తీసుకోవాలి. చదువు తర్వాత ఇచ్చే 485 వీసా నిబంధనల్లో ప్రభుత్వం కీలక మార్పు చేసింది. నవంబర్ 13 నుంచి ఈ కొత్త రూల్స్ అమల్లోకి వచ్చాయి.

ఇప్పటివరకు విద్యార్థులు తమకు వీసా వచ్చిన తర్వాత భార్య లేదా పిల్లలను ఆస్ట్రేలియాకు తీసుకెళ్లేందుకు విడిగా దరఖాస్తు చేసుకునే అవకాశం ఉండేది. కానీ ఇప్పుడు ఆ వెసులుబాటు సాధారణంగా ఉండదు. విద్యార్థితో పాటు అర్హులైన కుటుంబ సభ్యులు కూడా ఒకేసారి దరఖాస్తు చేయాల్సి ఉంటుంది.

అయితే గతంలో స్టూడెంట్ వీసాలో డిపెండెంట్లుగా ఉన్న భార్య, పిల్లలను చేర్చుకోవడానికి అవకాశం ఉంది. కొన్ని ప్రత్యేక వర్గాలకు కొత్త కుటుంబ సభ్యులను చేర్చుకునే మినహాయింపులు కూడా ఉన్నాయి. పసిఫిక్, ఆసియాన్ దేశాల పౌరులు, స్టూడెంట్ వీసాపై ఉన్నప్పుడే పీహెచ్‌డీ పూర్తి చేసినవారు, విదేశీ ప్రభుత్వ నిధులతో పూర్తిగా చదువు పూర్తి చేసినవారు ఈ మినహాయింపులు పొందవచ్చు.

పిల్లలకు సంబంధించి కూడా కొన్ని వెసులుబాట్లు ఉన్నాయి. తల్లిదండ్రుల తాజా వీసా వచ్చిన తర్వాత ఆస్ట్రేలియా బయట పుట్టిన బిడ్డను తదుపరి 485 దరఖాస్తులో చేర్చవచ్చు. ఆస్ట్రేలియాలో 485 వీసా ఉన్న తల్లిదండ్రులకు అక్కడే బిడ్డ పుడితే, ఆ చిన్నారికి అదే వీసా హోదా లభిస్తుంది. అయితే జనన వివరాలను అధికారులకు తెలియజేయాలి.

నవంబర్ 13కి ముందు దరఖాస్తు చేసినవారికి పాత నిబంధనలే వర్తిస్తాయి.