2008లో ఆస్ట్రేలియా వెళ్లిన భారతీయ యువకుడు.. ఇప్పుడు ఆయన సాధించిన ఘనత ఏంటో తెలుసా?

విదేశాలకు ఉన్నత చదువుల కోసం వెళ్లిన ఎంతోమంది భారతీయులు అక్కడే స్థిరపడి వివిధ రంగాల్లో గుర్తింపు తెచ్చుకుంటున్నారు. అలాంటి వారిలో హిమాచల్ ప్రదేశ్‌కు చెందిన అభిషేక్ అవస్థి ఇప్పుడు ప్రత్యేకంగా నిలిచారు. ఆస్ట్రేలియాలో ఆయన సాధించిన తాజా గుర్తింపు భారతీయుల దృష్టిని ఆకర్షిస్తోంది.

మండికి చెందిన అభిషేక్ అవస్థి ఆస్ట్రేలియాలోని విక్టోరియా రాష్ట్రంలో ఉన్న గ్రేటర్ బెండిగో నగరానికి మేయర్‌గా ఎన్నికయ్యారు. ఈ పదవిని చేపట్టిన తొలి భారతీయ సంతతి వ్యక్తిగా ఆయన చరిత్ర సృష్టించారు. కౌన్సిల్ సభ్యులు ఆయనను ఏకగ్రీవంగా ఎన్నుకోవడం విశేషం.

అభిషేక్ ప్రయాణం 2008లో ప్రారంభమైంది. ఉన్నత విద్య కోసం ఆస్ట్రేలియా వెళ్లిన ఆయన లా ట్రోబ్ యూనివర్సిటీలో బయోటెక్నాలజీ, బయోఇన్ఫర్మేటిక్స్‌లో చదువుకున్నారు. చదువుకుంటూనే పార్ట్‌టైమ్ ఉద్యోగం చేస్తూ తన ఖర్చులను నిర్వహించుకున్నారు. 2015లో ఆస్ట్రేలియా పౌరసత్వం పొందారు.

బెండిగోలో స్థిరపడిన తర్వాత స్థానిక సమాజంతో మంచి అనుబంధం ఏర్పరచుకున్నారు. పలు స్వచ్ఛంద కార్యక్రమాల్లో పాల్గొనడంతో పాటు, అక్కడి భారతీయ కుటుంబాలను ఒకే వేదికపైకి తీసుకురావడానికి ఇండియన్ అసోసియేషన్ ఆఫ్ బెండిగోను స్థాపించారు.

2024 నవంబర్‌లో కెన్నింగ్టన్ వార్డు నుంచి కౌన్సిలర్‌గా ఎన్నికై రాజకీయాల్లోకి అడుగుపెట్టారు. అనంతరం డిప్యూటీ మేయర్‌గా పనిచేశారు. ఇప్పుడు నగర మేయర్‌గా బాధ్యతలు చేపట్టే స్థాయికి చేరుకున్నారు.

మేయర్‌గా స్థానిక వ్యాపారాలకు ప్రోత్సాహం, పర్యాటక అభివృద్ధి, కొత్త ఆవిష్కరణలు, ప్రజలకు మెరుగైన సేవలు అందించడంపై దృష్టి పెట్టాలని అభిషేక్ భావిస్తున్నారు. అలాగే అందుబాటు ధరల్లో ఇళ్ల నిర్మాణం, మానసిక ఆరోగ్య సేవల విస్తరణకు ప్రాధాన్యత ఇవ్వనున్నారు.